YOUNG MIZO ASSOCIATION KUMPUAN REPORT FORM - BRANCH 2008

YOUNG MIZO ASSOCIATION
KUMPUAN REPORT FORM - BRANCH
2008

Branch hming : Kahrawt Branch YMA
Group awmna : Sub-Headquarters YMA, Champhai
Report petu hming : R.Malsawmdawngliana
Branch a nihna : Secretary
Report ni : Dt. 19.8.2008
Member zat : Mipa - 450 Hmeichhia - 318 Life member- 41 Total - 881
1. Kumpuan Ruihhlo Do kan neih hma kum 2004 thlenga in dinhmun engte nge ?

a) Zu zuar zat : 5
b) Ruihhlo zuar zat : 35
c) Ruihhlo ngai zat : Zu - 79 ; Drugs - 103

2. Kumpuan Ruihhlo Do kan neih hnu a in dinhmun engte nge ?

a) Zu zuar zat : Nil
b) Ruihhlo zuar zat : Zu standing in mi 1 leh No.4 standing in mi 4
c) Ruihhlo ngai zat : 15
d) Zu / Ruihhlo ngai sim zat : 167

3. Kumpuan vanga in hmalakna engte nge ?

a) Sikula Awareness neih zat : Nil
b) Camping/Campaign neih zat : Nil
c) Zu / ruihhlo ngai chhawm dawl zat : Nil
d) In sak leh sum leh paia chhawm dawl zat : Nil
e) Camping/Campaign senso zat : Nil
f) Kohhran leh NGO hrang hrangte nena meeting neih zat : Vawi 2
g) Kumpuan hnatlang neih zat / tha sen zat :
_ Veng pawnah vawi15 leh Hall ah regular taka Duty \hin a ni.

4. Ruihhlo a vanga harsatna in tawh dante.

a) Zu zuar (pakhat aia tam an nih chuan a chhannna phek hrana siam mai nise)
i) Eng vanga zu zuar nge : Zu in thin anihnavangin ama in tur a hlep na atan
ii) Kum engzat nge an zawrh tawh : Thla thum vel
iii) Kum engzat minge an nih : Kum 40
iv) Eizawnna kawng dang zawh thei an ni em :.Ni e

b) Ruihhlo zuar (pakhat aia tam an nih chuan a chhannna phek hrana siam mai nise)
i) Eng vanga zuar nge : No.4 ti thin vek anih avangin an mahni ruihna tur hlep nan.
ii) Kum engzat nge an zawrh tawh :.Thla li vel
iii) Kum engzat mi nge an nih : Kum 25-35 inkar vek
iv) Eizawnna kawng dang zawh thei an ni em : Ni e

c) Ruihhlo ngai (pakhat aia tam an nih chuan a chhannna phek hrana siam mai nise)

i) Kum engzat a nih a\angin nge Ruihhlo a tih.
_ Henga Ruihhlo ti kan neih te hi Kum Upa lam, YMA ah pawh a in hmang tawh lo mi 10 vel an ni a, YMA Member ni lai chu mi 10 vel bawk an ni. Ruihhlo an tih \an kum tak hi a tlangpui thu in Kum 18-25 inkar bawr vel an nih a\anga khawih \an an ni.
ii) Eng Ruihhlo nge an khawih.
_ Henga Ruihhlo ti kan neih te hi Zu in mi 20 bawr vel leh No.4 ti thin mi 10 bawr vel an ni.
iii) Sikul eng thleng nge an kal.
_ Ruihhlo ti zing ami mi 10 vel hi Class V - VII thleng vel kal an ni a, mi15 vel hi Class VIII - X inkar vel kal an ni a, mi 5 vel hi HSLC a chin a chunglam zir thleng an ni.

iv) Ruihhlo avanga thi eng zat nge in neih tawh.
_ Kumpuan atana “Ruihhlo Do” hman a nih hnuah Ruihhlo avanga thi kan la nei lo a ni.

5. Kumpuan pualin inkhawm buatsaih a ni em ? A nih chuan a hun leh hmun leh hman dan tlangpui tarlan nise.
_ Kuminah hian a hranpain kumpuan pual inkhawm buatsaih ani lova, YMA Kumpuan la kal zel anih avangin a hranpa a hawn ngaiah kan dah lo a ni. Amaherawh chu members meetingah leh YMA function reng rengah ruih hlo tih a thatloh zia members te hnenah sawi thin a ni.
6. Kumpuan bawhzui tur Committee / Sub-Committee in din em ? Ruihhlo do nan tum engzat nge in Committee ?

_ Dt. 17.1.2008 a Branch Executive Committee chuan Kumpuan Sub-Committee a din a. Kumpuan avangin vawi 20 Committee neih a ni. Kumpuan hruaitute chu:

Kumpuan Sub-Committee :
Chairman : Pu David Thangluaia
Vice Chairman : Pu C.Lalbiakchuanga
Secretary : Pu Zoherliana Hauchhum
1) Research & Survey Cell : Chairman : Tv H. Sapchhawna
Vice Chairman : Tv C. Zirtlianthanga Secretary : Nl. PB. Liansangpuii
2) Security Cell :
Chairman : Pu Thanghuliana
Vice Chairman : 1) Pu R.Laldika
2) Pu Ronald Lalfakzuala
3) Pu H.Vanlalhriata
4) Pu H.Lalzawmliana
5) Pu F.Vanlalruata
Secretaries : 1) Pu C. Lalrawngbawla
2) Pu Thangkunga Chhangte
3) Tv PC. Zairemthanga
Treasurer : Pu F.Lalhmachhuana
Fin. Secretary : Pu David Thangluaia

7. Ruihhlo zuar leh ngaite \anpui nan \anpuina engzat nge in pek chhuah?

_ Kumin chhung hian ruih hlo zuar leh ngaite tanpuina pek chhuah kan nei lo.
8. Ruihhlo man zat:
Ruihhlo hming Man zat A man(Pawisa a chhutin)
BEDC 288 Fun Rs. 57600/- Local 15 Litre Rs 6000/- Zu sen 16 Bottles Rs. 1500/- No 4(Heroin) Piece 34 Rs. 3400/- Zu Bel 1 Rs. 1500/-
Total : Rs.70000/-

9. Zu leh Ruihhlo laka in member-te an fihlim theih nan engtin nge in Branch in hma in lak? Hmalak dan tlangpui tarlan nise.

_ Hma lakna hranpa kan nei lo.

10. Ruihhlo zuar leh ngai sim tawh zat ?

_ Ruihhlo zuar hi kan veng chhungah an awm tawh lova. Ruihhlo ti \hin erawh chu tunah hian zu avangin mi 20 kan la nei a, Drugs tih ching mi 10 vel kan la nei a; Kumpuan tirh a\anga chhut chuan Zu in \hin sim hi mi 59 an niin Drugs ti \hin mi 93 in an sim a ni.

11. Branch chhunga Kohhran, Sawrkar, Political Party leh tlawmngaipawl dangte nen Kumpuan chungchangah thawh hona a \ha em? Thawh ho dan tlangpui tarlan ni se.

_ Vengchhunga Kohhran, Sorkar, leh Tlawmngai Pawl dangte nen kan thawhhona a \ha hle a, kan thawhhona tlangpui chu hetiang hi a ni e:

1) Kahrawt Presbyterian Kohran Social Front te nen \angkawpin an ni hian YMA in ruihhlo a donaah min thlawp tlat reng a ni. Tin MHIP ten kan Security cell te tha tih chakna turin a khat tawkin sum leh paiin min tanpui reng bawk a, hei hian kan hma laknaah kan tha a tih chak phah hle a ni.
2) Kumpuan bawhchhia kan man te, thuneitute kuta pek an nih reng reng in Excise/Police Department te nen in bia in an kutah hlan thin an ni a, an ni pawhin zan rei pawh sawi lovin kan mamawh hun apiangah lo kal in thatho takin min rawn tawiawm thin a kan thawh hona a tha hle a, a lawmawm hle.

12. Ruihhlo laka naupang te leh \halaite an fihlim theih nan an pualin hmalak a ni em? Eg: YMA chhang pual programme, School tlawh, Camping etc.

_ Ruihhlo laka naupangte leh \halaite an fihlim theih nana an pual a hmalakna kan nei hran lo
13. Nu leh pate pualin hmalak ani em ?

_ Ni lem lo.

14. Vengchhung Chanchinbu ah Kumpuan pual hmalakna in tarlang \hin em? Tarlan a nih dan ?

_ Branch YMA Chanchinbu ‘Kahrawtians’ ah Kumpuan column siam a ni a, hetah hian Kumpuan chungchang thuziak leh hmalakna hrang hrangte tarlan \hin a ni.

15. YMA Kumpuan “Ruihhlo do” chungchanga in Branch hmalakna chhinchhiah tlak bik te tarlan nise.
_ Ruihhlo sim kan member ten eizawnna an hmuh theih nan kan veng chhunga mi awmtheite leh veng \henawma kan nel zawng deuh te hnenah inhlawhna tur remchang an neih ang apianga duhsak tura ngen an ni. Branch YMA in hna thawh tur a neih chang pawhin heting mite hi duhsak bik an ni.
16. Ruihhlo do Kumpuanin memberte hnenah a chhe lam leh a \ha lama nghawng a neih dan tarlan nise.

_ Kumpuanin a \ha lama nghawng a neih dan :

1) Kumpuan avangin Dt. 26.1.2005 a\angin Kahrawt veng chu Dry Area ah puan a ni a, hemi avang hian kan Branch YMA Member engemaw zatin ruihhlo hi an tih loh phah a ni.
2) Kumpuan avanga Ruihhlo sim tawh ten an mahni phak tawk ang \heuh a \hanem ngai tak leh taima takin mahni hna maibakah mite hnena inhlawhfa a hna thawhte an lo peih tharin chhungkaw tam tak hlim takin an in dinthar leh phah a ni.
3) Kumpuan “Ruihhlo Do” puan a nih a\angin kan veng chhungah Ruihhlo avanga
3) Kumpuan “Ruihhlo Do” puan a nih a\angin kan veng chhungah Ruihhlo avanga thi an awm lo.
4) Ruihhlo in a tihbuai avanga YMA a pawh a in hmang zui hlei thei lote YMA Activities hrang hranga a kul a taia an \ang ta kan hmuh hian Ruihhlo Do hi a hlawhtling kan ti lo thei lo.
5) Kumpuan atana Ruihhlo Do kan neih a\angin veng chhung chu zan lamah pawh Hmeichhia leh Upa zawkte tan pawh a thlamuang taka teihawi ngam a ni ta te hi Kumpuan hlawhtlinna ah kan ngai.

A chhe lama nghawng a neih dan :

1) Branch a mi \hahnem ngai tak tak mi \henkhat Ruihhlo a fihlim lo te YMA Activities hrang hranga an lang hlei thei lo hi pawi kan ti hle.
2) Member \henkhat Ruihhlo a an fihlim loh avanga an Member nihna hlihsak ngai an awm \hin hi a pawi kan ti hle.

17. Kumpuan Half yearly Report CYMA ah in theh lut \hin em ?

_ Nil
18. A chunga tarlan bak hmalakna leh ziak \ul dang a awm chuan tarlan nise.

YMA BRANCH ANNUAL REPORT FORM 2008

YMA BRANCH ANNUAL REPORT FORM
2008

1. Branch hming : Kahrawt Branch YMA, Champhai

2. Office Bearers
Nihna Hming Phone Number President Thanghuliana 234671/9436350827 Vice President R.Laldika 235283/9436145025 Secretary R.Malsawmdawngliana 234440/9436145320
Asst. Secretary PC.Zairemthanga 235109/9436377646
Treasurer F.Lalhmachhuana 234702/9862725751
Fin. Secretary C.Chawngthansanga 234436/9436377812

3. Committee neih zat : OB vawi 19 leh Executive Vawi 5

4. Member zat : Mipa - 450 Hmeichhia - 318 Life member- 41 Total - 881

5. Hnatlang neih zat : Voluntary - 15 Fund rising - 6 Total - 21

6. Kumin 2008 chhunga Member boral zat : 3
Hming : 1. Lalmaka 2. TJ.Lalhruaitluanga 3. Lalengzama

7. Tanpui ngai tanpui zat : 14

_ YMA Day denchhenin vengchhung a mi harsa deuh te leh damlo tanpui ngai nia hriatmi 10 hnenah pawisa fai a tanpuina hlan a ni, hemi bakah hian damlo na zual tanpui ngai mi 4 hnenah tanpuina pawisa fai pek leh ani. Tin, mimal hnena sum faia tanpuina sem anih bakah hian Champhai District Hospital Poor fund atan Pawisa fai chhunluh bawk ani.

8. Kumpuan bawhzui dan :

_ Kumpuan bawhzui dan tlangpui hetiang hi a ni.

1) Kumpuan bawhzui tu turin Committee mumal taka din a ni.

2) Security in an man te Excise leh Police kutah an Case a zirin hlan thin a ni.

3) Veng chhungah Security ngawrh taka duty thin a niin veng pawn lamah pawh vawi engemaw zat Duty hian kal a ni bawk.
9. Branch hmalakna :

_ Heng a hnuaia kan tarlan hrang hrang te hi Kumin 2008 chhunga kan hmalakna hlawhtling tawh langsar zual deuh deuh te an ni.

1) Thlanmuala Thlanlaitute leh Thlantlawh tuten an chawlh hah damna atanah Chawlhbuk chu Concrete a tha tak Rs 520000/- senga sak a ni a, he chawlh bukah hian Thlan laihna hmanrua dah khawmna turin Godown dah tel a ni a. Tin hei bakah hian thlan siam tuten awl sam zawk leh senso tlem zawka thlan siam a nih theih nan Tui, Balu leh Cubic lung te dahna in tha tak siam tel nghal a ni.

2) Thlanmual ram sira Grace Hill Sikul bul Retaining Wall Rs 50000/- man chu 17 Ft a sei leh 3Ft a sang chu Branch sum tuak nan thawh a ni a. He hna hi Kahrawt Village Council te nena kan hmalak hona atanga hmuh a ni.

3) Khawtlangin chhiatni thatni a hman turin Thutthleng 100 siam thar a ni a, heng thut thleng te hi YMA rawng hnawih thlap a ni. Tin kan thutthleng neih sa te pawh YMA rawng hi hnawih thar vek an ni bawk.

4) Lengkhawm hlabu ‘Mizo Rohlu’ tih, a thluk in mila siam Hla 347 awmna chu 1500 Copies Central YMA Press a chhut tir a niin Rs 90000/- zet hetah hian senral a ni.
10. Branch Assets neih dan :

10. Branch Assets neih dan :
1. Library : Nei 2. Park/ Sanctuary : Nei lo
3. Sangha dil : Nei lo 4. YMA Hall : Nei

11. YMA chanchinbu in chhuah em : Kahrawtians Chawlhni apianga chhuak turin tih Chhuah a ni.








Branch Seal Report petu : R.MALSAWMDAWNGLIANA
Designation : Secretary
------------------------------------------------------------------------------------------------

Champhai Kahrawt Branch Y.M.A. Chanchinbu * Volume XVIII * Issue No 13 * Date. 29. 3. 2009

KHAWTLANG NUN SIAMTHAT
(Moral & Social Reform)

Politics lamah : Mizote hi chawhrual (average) a laka khawvel Politician tamna ber kan ni hial awm e. Kan Politics khelh dan danglam tak erawh chu, ram siam tha tura party zawm tum lovin, a chak tur pawl zawm kan tum tlangpui a, Ruling party unit leh Block a O.B nih kan chak chhan ber chu Contract leh therhlo hmuh nan leh fate tling manglo sawrkara thunte ani fo thin. Duh ang kan hmuh loh chuan ‘Ruling party nih man a awm lo, kan pawl atang hian ka bang dawn’ tihte kan ching bawk. Eng Party ah pawh kan Minister-te leh Politician-te hian ram tih hmasawn tumin theihtawp chhuah mahse, mipui lam hian ani lo lamah hruaikawi in, thil diklo, party induhsakna hleihluak taka hmantir kan tum avangin Minister fel takte pawhin an duh bak thil diklo mipui nawrna avangin an ti fo thin.
Election : Kan inthlanna hi a tenawm sawt hle a. Tunhma a kan hriat ngailoh sum leh paia in leite, ralthuam chelek leh inrikrapna mak tak tak te pawhin kan inthlanna chu min chim ta. Mihausa tan lo chuan MLA ah din ngam ani ta lova, tlai lam a thalai intelkhawm rual ‘kan thian za ho 40 te hian Vote kan la thlaklo, lei theih kan ni’ti thin ho hian Candidate leh an Agent te lu a tihai takzet thin. Khangmite khan Candidate tin ah Pawisa lak an tuma.Candidate tan chuan lei dawn a anmahni Vote ring chuang silo, lei dawn loh a hlauhthawn nei bawk siin an awm a, candidate-te an ti mangang thei em em a ni.
Zirna (Education) lamah : Tun hma chuan Mizote hi tih tak taka lehkha zir kan tam avangin zirtirtu in daih loh tak tak na hmun thingtlang sikul atang pawhin IAS, IPS leh Central Service Officer engemawzah an lo chhuak a, kum 1960 - 1970 tir lam thleng kha chuan hnamdangte chuan ‘Mizote hian IAS tihchhuahna khawl an nei a ni ang’ an ti hial thin. Tunlai erawh chuan tih tak taka lehkha zir ai chuan in cheina, thingpui dawra chawlh leh Mobile Handset tha neihte kan tuipui zawk avangin IAS leh Central Service Officer kan nei tlem ta tial tial a ni. Chuvangin kan zirna sikul leh Zirlaite leh an nu leh pate pawhin a thara nasa taka tan kan lak a ngai a ni.

-------------------------------------------------------------------------------------------------

MHIP Hriattirna

Dt. 1-2 April 2009 a Hnahlana MHIP Sub-Hqrs Conference lo awm turah Memberte a tam thei ang ber kal turin kan in ngen a ni. Zan riak leh langin a kal theih a. Riaka kal turte chu Dt 1.4.2009 Dar 10:00 AM ah kal tur a ni a, langa kal turte chu Dt. 2.4.2009 Dar 5:00 AM ah Dawrkaikawnah kim vek tur a ni. A kal turte chu Vawiin ni ral hma ngei in heng a hnuaia hming ziak hnenah hian in report tur a ni.
Pi V. Lalthanpuii - 9862120553
Pi B. Lalengpari - 9862564372
Pi H. Rohmingliani - 9862501783

-------------------------------------------------------------------------------------------------

Sport neih a ni.

Sub-Hqrs YMA in a hnuaia Branch hrang hrangte inel nana a buatsaih chu zawh fel a ni ta a, heng a hnuaia kan tarlan te hi kan Branch aiawh a chhuakte an ni. Mi tamtak tel tura sawm an nih laia theilo engemaw zat an awm avangin a chhuakte pawh hi kan veng atanga thiam leh thei ber berte an ni lova, tlawmngaia chhuak an ni. Tug of War leh Discuss throw (Men) erawh chuan veng chhunga chhiat tawk kan awm avangin kan tel thei ta lova a pawi hle a ni.
100 M Intlan siak :
Lalhlanmawia, Vanlalhriatpuia
Rodingliana, C.Lalhlimpuii
H.Lalruatkimi
Rlay Race
Lalhlanmawia, Rodingliana
Lalhmingmawia,
Andrew Lalbiakzuala, TS-i
C.Lalrampari, C.Lalmuansangi, Lalthatluangi.
Marathon Race
Laldinzuala, Vanlalfela
Long Jump
Lalhlanmawia, Lalthatluangi, C.Lalmuansangi
Jevelin Throw
Lalhlanmawia, Lalengkimi
Shot Put
C.Zoramthara, Andrew Lalbiakzuala, Vanlalsawmi, Lalrinmawii, Lalengkimi, TS-i
Volley ball (Women)
Lalnuntluangi, Lalnunsiami, TS-i, KB.Remruatsangi, Lalrinmawii, Lalthatluangi, Saihmingmawii, MS.Dawngzuali, C.Lalmuansangi, Zosangpuii.
Discuss throw
Vanlalsawmi, Lalengkimi

-------------------------------------------------------------------------------------------------

In enlet a ngai

Sub-Hqrs YMA chuan Central YMA in intihsiakna a buatsaih huna kal tur zawnna a buatsaih zawh takah khan kan Branch pawh tel ve a ni a, amaherawhchu kan Branch aiawh a chhuak tura kan sawmten harsatna siam si lova a huna an che chhuak hleithei lo hi enge a chhan ni ta ang le?
Kan veng hi infiamna lamah chuan a thei ber berte veng kan inti ve thin a, amaherawhchu tun hnai deuh atang infiamna lamah hian kan hniam ta hle mai a. Sub-Hqrs YMA in Branch te inelna a buatsaih ah pawh chhuak tur mumal kan nei ta lo te hi a zahthlak hle a ni. Hei hi tu mawh nge ni ang.
Hruaituten thahnemngai taka Sport theiawm leh chhuak awmte ina len chilh meuha an sawm laiin chhuak thei kan tlem ta lutuk hi Member ten hruaitu te zui tlakah kan ngaih loh vang nge, kan tlawmngaihna a dal zo ta zawk? Veng tana kan theihna te hmang phal kan awm ta lo lutuk te hi in enlet kan ngai hle a ni.
Tin, hnatlan ni khua ah pawh Member 798 lai awmna ah hnatlang kan beitham hle thin mai a, hruaitute tan pawh hmalak a harin a luhai thlak hle a. Member ten hruaitute hi zui tlakah kan ngai lo a nih chuan chawl mai turin ngen ila, tumah hi an chawl hreh lovang. Chumi a nih si loh chuan veng tana thahnemngai taka thawk chhuakin kan puan vente sawi chhingin theih tawp i chhuah thar leh teh ang u.

-------------------------------------------------------------------------------------------------

Pem lehkha

Pu KC. Vanlalruata-te chhung Member 4 chu Chaltlang atangin an rawn pem a, an hnen atang hian pem lehkha fel tak dawn a ni.

-------------------------------------------------------------------------------------------------

HSLC Pass tharte

A hnuaia kan tarlan te hi kan veng atanga HSLC Pass thar kan hriat theih chinte chu a ni.
1. B.Biakremmawia Dist. (Sc,M,SS,Eng)
S/o B. Vanlalhruaia T. Sec.
2. K. Lalramengmawia Dist.
(Eng, Sc, SS)
S/o K. Lalbiaksanga T. Sec.
3. Zothanpuii I (MZ)
D/o Vanlalsiama Ch. Sec
4. K. Lalruatfeli I (SS)
D/o K. Lalhmingliana T.Sec
5. Zoramdinthari I
D/o Ronald Lalfakzuala K. Sec
6. Cruz VL Ruatsanga I
S/o Sanglianngura K. Sec
7. Lalrampanzela III
S/o Lallianvunga Ch.Sec
8. Angela Lalnunthangi II (Sc)
D/o Lalchhuanawma Fanai K.Sec.
9. Lalnunnemi III
D/o Sawmenga K.Sec.
10. Lalchawileni II
D/o Dr.Aichhunga T.Sec
11. Lallawmkimi Hnamte II
D/o H.Lalrindika V.Sec
12. Zosangliana II
S/o Laldawngliana T.Sec
Bracket chhunga kan tarlan hi letter an hmuhna subject a ni. Hmaih palh a kan nei anih chuan in hriattir zel ni se.

-------------------------------------------------------------------------------------------------

Lawmthu

Dt.28.3.2009 (Inrinni) khan kan Branch YMA Hall chu wiring siam tha a hnatlang neih a ni a. Hnatlanga thawk chhuakte :
Pu H.Lalzawmliana, Pu K. Zoramkhuma, Pu K. Lalrammawia te chungah Branch chuan lawmthu a sawi takmeuh a ni.

-------------------------------------------------------------------------------------------------

##Ram leh khawtlangin hma a sawn tak tak dawn chuan, kan hmun ram a zirin tuar tawk kan awm a ngai thin a. Chutah chiah chuan veng leh khawtlang hmangaihtu tak tak chu a hriat thin. - 9862657507

## Vengthar nula pali lekin an veng chu Branch tha ber an nih pui thei a, Kan Branch atanga chhuak tura hruaitu ten an ngen ngawi ngawih chung pawha Member 780 chuang awmna ah kan chhuak hlei thei lo leh Defending Champion kan nihna Mipa Volley Ball-a chhuak thei kan nei lo hi chu in enlet kan ngai hle in ka hria. Amaherawhchu kan Branch mualpho hlauh avanga tlawmngaia an theih zawng pawh ni lova chhuak ta te hi an fakawmin chawimawi an phu hlein ka hria.
- 9862885187

## Kan vengah hian Life Member 40 chuang kan awma, che chhuak thei kan nei tlem lutuk erawh hi chu thil mak tak niin ka hria, Life Member nih hi kan duh tawk ta mawi zawk em ni? Life Member kan nihna in a kentel kan hriat chhuah thar a va ngai em.
- 9862262207

## Kan veng chhung School BC.Academy in HSLC result chhuaka 100% a an naupangte an pass tir thei hi kan chhuangin kan lawmpui tak zet a ni. Tan la thar sauh sauh turin duhsakna sangber kan hlan e. - Branch YMA

------------------------------------------------------------------------------------------------

Kumin chhunga HSLC pass thar zawng zawngte kan lawmpui a,an kal zelna turah duhsakna sangber kan hlan e.

Champhai Kahrawt Branch Y.M.A. Chanchinbu * Volume XVII * Issue No 53 * Date.28.12.2008

Krismas tiak ta

Kumtluana kan lo nghah Krismas chu hlim tak leh kham lo takin tiak a ni ta a. Boruak duhawm lo thleng sawi tur a awm lova, a lawmawm hle. Vengchhung a Kohhran hrang hrang ten Krismas niin chhang ruai leh a nihnih ni-ah ruai nen Krismas hi hman ani hlawm. Kahrawt Branch YMA chuan he hun denchhen hian kum danga a lo tih thin dan angin vengchhunga damlo leh tanpui ngai nia a hriatte chhungkaw 10 hnenah pawisa fai a hlan a, ni 24 zingkar khan section hruaitu te nen tanpuina hi an sem. Tanpuina an pek te chu : Pi Liansawti, Pi Lalremi, Pi Vungi, Pi Hmingi, Pi Fungi, Pu B.Thangvela, Nl Lalchawimawii, Pu Khuangsailova, Pu B. Thangchhuaka, Pu Piangliana te an ni.

-----------------------------------------------------------------------------------------------------

VC ten sem

Kahrawt Village Council chuan Krismas denchhen hian vengchhunga damlo kanna leh kum 90 chin chunglam min la dampuitute hnenah lawmpuina sum an sem.
Damlote : Pu Khuangsailova, Pu Ramfangzauva, Pu Piangliana, Pu B Thangchhuaka.
Kum 90 chin chunglam lawmpuina pek te : Pi Kapthuami, Pi Nuthangi, Pi Lianziki.

--------------------------------------------------------------------------------------------------

Inthlang dawn

Kum 2009 Kahrawt Branch YMA hruaitu tur thlanna chu Dt 1.1.2009 chhun dar 12:00 khian YMA Hall-ah neih tur ani a, Post by post a inthlan tur a niin nomination hranpa siam ani lovang. Post tina vote hmu sangber chu tlinga puan ani ang. Inthlanpui turin kan Branch YMA Advisers-te leh Sub- Hqrs YMA Champhai, Asst. Secy. Pu Hrangthansiama Mizo te ruat ani. Returning Officer turin Pu K. Vanlalzuata, Recording Secretary turin Pu C. Vanlaldinga te ruat an ni. Inthlan Programme hetiang hian duan ani:
Chairman : Pu Thanghuliana President KYMA
Hunserh : Nl K Lalbiakthuami Exe. Member
Report : 1) Secretary report
2) Finance Report
Kum 2009 hruaitu tur thlanna in a zui nghal anga, inthlan vote chhiar karlakah hian chawimawina leh lawmman hlan tur awm ang te a remchan dan anga hlan ani anga, Chawimawina hi Pu R Laldika Vice President in a hlan anga, Thisen petute chawimawina Pu C Chawngthansanga Finance Secretary in a hlan thung ang. Kahrawtians Award buaipui turin Editor ruat ani a, amah puibawm turin Editorial board members te beisei an ni bawk. In thlan zawh fel anih hnuah President thlan thar hnen atangin thusawi ngaihthlak ani ang.
Inthlan hi members ten ngaipawimawh hram hram ila, thianghlim tak leh felfai taka kan in thlan theih nan rilru fim tak hmangin, YMA inthlang tur kan nih hre rengin YMA takin kan rilru kan dah a pawimawh hle ani.

--------------------------------------------------------------------------------------------------

Section

Section hrang hrang ten section report an thehlut kim tawh a, intihsiakna turin tehfung chi hrang hrang hmanga report te hi endik tur a ni.

--------------------------------------------------------------------------------------------------

Handset Bo

Kahrawt field-ah Handset tha tak leh man to tak tihbo ani a, a chhartu hi kan vengchhung mi ngei nia hriat a ni a, a lo chhartu khan Branch Secretary hnenah emaw President hnenah emaw pe thei ula a lawmawm hle ang.

--------------------------------------------------------------------------------------------------

Security

Group hrang hrang duty dan tur : Dt.28.12.2008 - Group -III, Dt.29.12.2008 -Group-I Dt.30.12.2008 - Group-II, Dt.31.12.2008 zan hian member zawng zawng duty tur a ni a. Security member te kim taka chhuahkhawm thin ni sela, Member te tlawmngaia kan chhuah taihmak a ngai hle a, tunlai hian zantin hall-ah duty a chhuah khawm thin a ni a. Harsatna engemaw Security te punna chi reng rengah chuan Hall phone No. 234728 ah biakpawh theih reng an ni.

--------------------------------------------------------------------------------------------------

Naute thar

Kan Cir.Manager Pu RC.Lalsang-
zuala chuan a pakhatna atan fanu thar duhawm tak an nei a, Kahrawtians chuan kan lawmpuiin duhsakna kan hlan e.

--------------------------------------------------------------------------------------------------

Bawlhhlawh

Bawlhhlawh khawlaiah hmuh tur a tam leh ta, mitinte mahni in leh a vel vawngfai zel turin kan in ngen nawn leh a, veng fai ni thei zel turin tan i la sauh sauh teh ang u.

--------------------------------------------------------------------------------------------------

Enkawltute Kamchhuak

Kum a lo tawp a, kumthar atan hruaitu tur thlan a lo hun leh dawn ta a. Thlan awm mi lo ngaihtuah lawk a tha hle ang. Hruaitu thlan fuh leh fuh loh inkar hi hla tak a ni a, pawlin hma a sawnin a thuanawp phah thei. Hruaitu thlan hi a thlangtu membr ten uluk a ngai hle a. Thian tha nih vang leh laina hna an nih avanga duhsakna lantirna chi a ni lo.Tu hian nge min hruai se kan chak pui anga, hma kan sawn phah ang tih leh tu hruaina hnuaiah hian nge pawl a him ang tih hi ngaihtuah hmaih chi a ni lo. Uluk lo taka hruaitu thlan a nih hian a thlangtu members te a phuanchiara tan leh mai a awl hle thin. An lansarhna aiin pawl tana tha leh chak an nihna hian min kaihruai zawk sela.
YMA hi tlawmngai pawl a ni a, tlawmngai pawlah pawh a ropui ber tih hial tur a ni. Tlawmngai pawlah reng reng tling leh fel nia in hriate hi hruaitu tha an ni duh lo fova, huphurh tak, hreh tak, tlawmngaih chhuaha hruaitu dinhmun pha ngamlo te hi a kul ataia tang an ni duh zawk. Pawl pawhin an that phah zel.
Hruaitu nih chak takte hian pawl hruai that emaw hmasawn tir lam ai mahin an mahni in tih lansarh leh inpholan an tum hmasa chawk a, chumi piaha a therhlo awm eng eng emaw an thlahlel duh hle bawk. Mahni insawi mawia tling nih ai chuan miten tling leh tlak nia an hriat avanga tling nih hi a hlu a, mi tak tak an ni zawk zel thin.
Mi pakhat chunga nihna tam tak nghah hian mi thar chherna a dip thei a, hruaitu tha tur dapchhuahna a dal thei thin. Chuvangin hruaitu kan thlan hian eng ang chanvo nge a chelh hlawm tih hi chhut tel thin ila a tha hle ang.

--------------------------------------------------------------------------------------------------

Lawmthu sawina

Kan fanu Lalchawimawii, natna khuma mu reng chu Kahrawt Branch YMA te leh Chawngbawla Section te chuan a damlo kan nan Krismas thilpek hlu tak mai min pe hi thinlung takin kan lawm takzet a, Pathianin a let tam takin malsawm zel che u rawh se.

In khawngaihna dawngtu
R.Lalremsiama te nupa
Chawngbawla Section

--------------------------------------------------------------------------------------------------

Fimkhur rawh!!!

Krismas leh kumthar vuakvet avanga zu rui ten kan vengchhungah buaina neuh neuh siam ching an awm leh zauh thin avangin fimkhur turin kan in ngen a. Kan veng hi Dry Area a ni tih kan hriat thar leh a tha hle awm e.
Tin, Dawrkaikawn cheina Krismas tree te leh khualbuk hungchhungah te tumah luh phal a ni lova, current a kal reng avangin fimkhur turin kan in ngen a ni.

--------------------------------------------------------------------------------------------------

Damlo

Pu Kapthuama (Kaptea) chu tunah hian Champhai District Hospital-ah a awm pumna avangin enkawl mek a ni a, a dam leh thuai kan beisei.

--------------------------------------------------------------------------------------------------

Lawmthu

Vawiin hi kumin chhunga Kahrawtians chhuah tawpna tur a lo ni ta reng mai. Thurawn tha tak tak min petute, kan Chanchinbu min laksaktute leh tlawmngai taka min sem saktu Agent te chungah lawmthu kan sawi takmeuh a, Keini a enkawltute hi mi thiam leh fel tumah kan awm lova, tlawmngaih chhuahin kan han sual ve chawt mai a ni a. Tlin lohna leh fel lohna tam tak kan nei ang tih kan in ring tlat a, mi rilru kan tihnat a lo awm anih pawhin in mi ngaihdamna kan han ngen bawk a ni.
A tawp berah chhiartu zawng zawngte Kumthar chibai kan buk a che u.

--------------------------------------------------------------------------------------------------

Bomb

Champhai Leilet zawl Tuipui-ah Bomb hmanga sangha man thin te zawng zawng sim turin kan in ngen a, hei hian Tuipui kam leilet a tihchhiat avangin ti tawh lo turin kan in ngen a ni. Bomb hmanga sangha mantu hria chuan Sub-Hqrs. YMA hnenah hriattir vat zel tur a ni a, Sub-Hqrs. a hming thehluh apiangte chu sawrkar thuneitute hnenah an ni hian an lo thlen zel dawn a ni.

--------------------------------------------------------------------------------------------------

Call Girl

Vengpawn atanga kan hriat danin phone atanga koh theih mi awm tha duhlo kan vengchhungah hian kan awm ve niin sawi a ni a, hetiang ang mi hi kan lo awm a, hriatchhuah anih chuan an chungchang hi YMA ten an rel ang ang hi an sawisel thei lovang.

--------------------------------------------------------------------------------------------------

CH. R. B Huang

KTP Award ah khan kan buatsaih chu nilo se CHHAICHHING award kha ka chang ngei ang, ka lo tawng ve laklawh tawh si a tiraw Papui.....
- Mavala (K.Sec)
e In leng nei rual chu ka ni ve tawh a sin mawle.. mahse.. pakhat mah... pakhat mah...
- Chhungremi (Pi Te-i)
e E khai.... ka nu... a man hi pek belh leh mai ang u...
- Biaka (V.Sec)
e Biaka, ngaihzawng neih dawn hian engtin nge an tih thin a?
- Tv.Sapa (V.Sec)
e Suihlung a leng vawng vawng... lo kir leh hram rawh chun nunnem, i hraileng ten an/kan ngai che.... - Lalsangliana
e E he....Kimpuii chu(h), 5Kg zet a hringa, a in hliam miah lo maw!!! ka awih thei lo....
- Sangzuala

--------------------------------------------------------------------------------------------------

Blog : www.kahrawtians.blogspot.com

Champhai Kahrawt Branch Y.M.A. Chanchinbu * Volume XVIII * Issue No 1 * Date.4.1.2009

Kahrawt Branch YMA Hruaitu thlanna neih a ni

Dt.1.1.2009 khan Kahrawt Branch YMA hruaitu tur thlanna chu Kahrawt Branch YMA Hall-ah tluang taka neih zawh a ni ta a. He hunah hian kum 2008 Kahrawt Branch YMA dinhmun report kimchang tak Pu R.Malsawmdawngliana, Branch Secretary hnen atanga ngaihthlak a ni a, Branch sum dinhmun pawh Pu C.Chawngthansanga, Fin.Secretary hnen atanga ngaihthlak ani bawk.
Inthlanna min neih pui turin Pu K.Vanlalzuata Returning Officer atan ruat a ni a, Pu C.Vanlaldinga chu Recording Secretary atan ruat a niin Polling Officer atan Branch Advisers te ruat an ni a, heng zing atang hian Pu B.Remmawia a rawn tel thei a, Pu Hrangthansiama Mizo, YMA Sub-Hqrs.Champhai pawh Polling Officer atan ruat aniin min rawn telpui thei bawk a, an chunga Branch chuan lawmthu a sawi mawlh mawlh a ni. Member kal khawm ten kum 2009 chhunga Kahrawt Branch YMA hruaitu tur an thlan chhuah te chu :
President : Pu R.Laldika
Vice President : Pu Thanghuliana
Secretary : Pu R.Malsawmdawngliana
Asst.Secretary : Pu Zoherliana Hauchhum
Treasurer : Pu F.Lalhmachhuana
Fin.Secretary : Pu C.Chawngthansanga te an ni.
Inthlan vote chhiar laiin kum 2008 chhunga zirlai titha chawimawina leh tlawmngaia damlo thisen petute chawimawina hun hman a ni bawk.
Kum tina kan lo tih dan thin angin kum 2008 chhunga Section thaber thlanna chu neih leh a ni a, tehfung chi hrang hrang sawmpathum hmanga intihsiakna hi endik anih hnuah Section thaber atan Chawngbawla Section chu Kahrawtians Award hlan an ni. Section dang zawngin Consolation prize an dawng theuh bawk.

--------------------------------------------------------------------------------------------------

Kum 2008 Finance Report Tlangpui

Pawisa hmuh zawng zawng - Rs. 2,34,209.00
2007 Balance - Rs. 62,978.00
TOTAL - Rs. 2,97,187.00TOTAL RECEIVED - Rs. 2,97,187.00
TOTAL EXPENDITURE - Rs. 2,36,838.00
CLOSING BALANCE - Rs. 60,349.00

--------------------------------------------------------------------------------------------------

Charge inhlan

Dt.3.1.2009 zingkar khan Branch O/B te chuan YMA Hall-ah charge in hlanna an nei.

--------------------------------------------------------------------------------------------------

Hriattirna

Kahrawt Grape Grower Association member zawng zawng te chuan kum 2009 chhunga hruaitu tur thlanna Dt.4.1.2009 (Sun) chawhnu inkhawm ban veleh Kahrawt YMA Hall-ah neih tur ani a, members zawng zawng ten ngaipawimawh a kal theuh tura ngen leh hriattir kan ni e.

--------------------------------------------------------------------------------------------------

Hnatlang dawn

Naktuk Thawhtanni hian Decoration Sub-Committee te chuan dawrkaikawn cheina thiah hnatlang neih an tum a, YMA memberte tlawmngaia a thei apiang thawkchhuak turin an ngen ani. Tihtur a tam dawn avangin kut rual deuh angai a, chuvangin mistiri te leh electrician lamte pawhin tawiawm zui zel turin an ngen bawk ani.

--------------------------------------------------------------------------------------------------

Lawmawm

Krismas leh kumthar kan tiak fel ta a, he mi hun vuak vetah kan veng chhungah zu leh ruihhlo avanga inman buai leh thil duhawmlo dang thleng lova kan hmang zo thei hi a lawmawm hle. Security duty te an rim hle a khawtlang muanna atana an in peknaah an fakawm hle ani.

--------------------------------------------------------------------------------------------------

Damlo

Tv Lalruatkima S/o K.Rokima chu a ril pawp avangin Aizawl panpui ani a, hlawhtling taka zai ani. Tin, Pu B.Lalnunmawia (Manuna) pawh tunah hian Aizawl lamah inenkawl in a thang mek bawk. Dam taka an lo haw leh kan duhsak takzet.

--------------------------------------------------------------------------------------------------

Enkawltute Kamchhuak

Kum 2009 kan lo chuang kai leh ta. YMA hruaitu thar kan nei leh ta bawk. Heng kan hruaitu thlan tharte hi member ten kan duh kan thlan chhuah an nih ang ngei hian a thlawp hna pawh kan mawhphurhna ani nghal ani tih kan hriat a tha hle. An mahni mai chuan tih theih an nei tlem hle a, Branch lian leh chak kan nih thin angin kan chakna chu memberte zawk hi an ni. Hruaitute an tlin lohna zawna rel leh sawisel lama ramtang lovin fuih a dawmkang tu nih tum theuh ila tichuan Branch chak tak kan ni reng mai dawn alo ni.
Mi tute mah hi hman vangin pawlah an in hmang lem lova. Mahni hna tul kalsana chet a ngai fo thin. YMA in tihtur aneih a tel te pawh hi an hman bik vang chu ani hauh lo. Hmanlo chunga member an nih avanga tel an ni zawk. Tlawmngaihna vawng nungtu YMA ah hian active member hi awm talo se chuan YMA pawh hi a ding reng thei hauh lovang. Mahni hna tul tlansana YMA tan inpe te avang hian kan la humhim hram hram ani chauh zawk ani. Kan eizawnna leh kan chhungkua aia pawimawh chu a awm thei hauh lova, amaherawh chu hemi piah lamah hian khawtlangin min mamawhna a neih hunah erawh chuan tlansan tawk kan neih ngam hi a tul fo thin ani.
Member ten member kan nih chhan hi ngun takin ngaihtuah thin ila. Hruaitute dinhmunah hian in dintir chhin fo pawh hi a tha hle. Tlawmngai peihlo ten midangte tlawmngaihna sang tak beisei leh phut hi thil inremlo tak ani. Mahni theihtawka khawtlang tana chet lak hi a Mizo a kan hnam nun tha kan humhim na ani bawk ani. Chuvangin mahni theihtawk theuhin i tang sauh sauh ang u.

--------------------------------------------------------------------------------------------------

LAWMTHU SAWINA
- Thanghuliana
Vice President KYMA 2009

Dt.31.12.2001 atanga ni 3 January ‘09 kum 7 leh ni 3 thleng Kahrawt Branch YMA President mawhphurhna hautak leh pawimawh tak kei tehlul koa ka member pui duhtak ten in nghah ve chhunga kan hmalakna chi hrang hranga in mi tawiawmna ah lawmthu ka sawi mawlh mawlh a, hemi hun chhunga ka thawhpui tura thlanchhuah, Office Bearer-te, Executive Members-te, Section hruaitu leh Sub-Commuittee peng hrang hranga mawhphurhna changtu zawng zawngte min finchhuahna leh kawng tinrenga hma hruai a ngah naah hma hruai a, hnung dawl a ngaih huna hnung dawla Kahrawt Khawtlang mawi loh hlau em em tute chungah thinlung takin lawmthu ka sawi mawlh mawlh a ni.
Kohhran hrang hrang te, Nu leh Pa, NGO hrang hrang te leh veng chhunga cheng Sorkar Department Officer leh Staff-te leh Political Party hrang hrang hruaitu, ken Kahrawt khawtlang hmangaihtute (hmun dang a awm tawhte zawng zawngte nen) tawiawmna vangin ka lawm em em a ni.
Sawi tel loh theih loh awm chu, he hruaitu chanvo tlinglo taka kan chelh ve chhung a, Kan veng chhung atanga Chatuan Ram min pansan ta kan ngaih em em te hetiangin; kum 2002-ah mi 8, 2003 ah 11, 2004 ah 8, 2005 ah 8, 2006 ah 12, 2007 ah 11, 2008 ah 10 leh veng pawn atang a mi 2 vui liam te nen mi 70 ten mual min liamsan ta hi thinlung takin ka ui em em a, YMA chu tanpui ngai te tanpuitu/ lusun khawhar te hnemtu a nihna ang taka tuartu chhungkua te tanpui leh hnem in ngaihna ah in mit tlun lohna tam tak kan nei ang tih ka hria a, khawngaih taka hriat reng tlak lohte min theihnghilh sak a, ngaihdam kan ngaihna zawng zawng a min ngaidam turin ka ngen che u a ni.
Kahrawt Khawtlang leh YMA dam reng rawh se.

--------------------------------------------------------------------------------------------------

Lam r’u

Nikum 2008 chhunga Kahrawt Branch YMA member, damlo tana thisen pe 39 chawimawite zingah chawimawina la dawng lo ten a rang thei ang bera Branch Secretary hnena lam thuai turin kan in hriattir a, ahnuaia mite hi an ni:
Sakhawliana, C.Lalrinngheta, Lalkimthanga, Kapliansanga, Lalrinsanga, Lalruatdika, C.Lalhlimpuii, Lalchhanhimi, Lalremruati, C.Zoramthara, Immanuel Ramtharzuala, C.Vanlalawmpuia.

--------------------------------------------------------------------------------------------------

CH. R. B Huang

@ Lalsawi kum 2009-a nau paw hmasa ber i ni tih ka puang e. - Muantea (K.Sec)

@ Branch hruaitu inseh competition a awm ang tih a hlauhawm hle mai. Kumin kan Branch hruaitu pawimawh pahnihte hi..(Pre & Secy) FUMFE pawh lam fiah thei tawh lo an nih hi.
- Hrangthana Mizo(Ch.Sec)

@ Congress zawng kan lo tam em ani Lalnunsiam. NLUP i duh ve chuan HAZUR min ti rawh. - Papuia(K.Sec)

@ Luaia Kanan veng lamah i rickshaw nen an hmu zing leh tawh viau che ania. - Mahmuna (V.Sec)

--------------------------------------------------------------------------------------------------

A in tlak ral lo zawnga changkan hi changkanna dik chu ani.

Champhai Kahrawt Branch Y.M.A. Chanchinbu * Volume XVII * Issue No 52 * Date.21.12.2008

Dawr rawk ching man

Dt.18.12.2008 zing lam dar 3:00 vel khan Upa K.Vanlalrova dawr Kahrawt KTP In chu ventilation bar karchhiain ,Vanlaldinmawia (15) S/o Hrangkunga Kahrawt leh a thianpa Benjamin Lalvenzuala (13) S/o Ramenga Vengthlang ten an rawk a, Laldinmawia hi dawr chhungah man a niin Lalvenzuala erawh a tlanchhia a, man zui lehnghal a ni.YMA hall-ah thu zawhfiah an niin an ni pahnih bakah hian an thurualpui thin Vanlalhriata (14) S/o F.Ramthanga Kahrawt an nei bawk.
Security hnena an inpuan danin September thla khan Pu R.Lalruala Liana veng ami dawr chu an pathum hian an rawk a. October thla khan Pi Lalbiakmawii Kahrawt dawr rawk lehin October thla tawp lamah Pi Hranghnuni dawr Vengsang KTP in chu an rawk leh a ni, November ni 19 khan Pi Mamawii dawr hi an rawk nawn leh a. November ni 23 zing khan Pi Sawmthangi Dawrkaikawna mi dawr chu rawk lehin December ni 4 khan Pu J.Ralkulhtawna dawr Vengsang Biak In bul ami an rawk leh bawk.
An chet hun hi zing lam dar 3-4 vel a ni tlangpui a, exercise la tur anga in sawm khawmin a hma nia rawk tura an lo rel lawk tawh dawrte an rawk thin. Thil lian tham tak lak erawh an nei ngailo in nepnawi leh eichawp thil an la tlangpui thin a ni.
Laldinmawia’n amah insawi thiam nana Security tena an vuak nat em avanga a tih loh pui ti anga inpuanga a insawi hi thu diklo a ni a. A thiante zawng zawng an inpuan hnu vekah pawh dawta a tan tlat avanga kut tuar zawk a ni. An ni pathum hi hun engemaw ti chhung chu hall-ah zan dar 7:00 PM a in report thin tura tih an ni a. An chungchang thu erawh hi chu an rawk dawr neituten engtiang in nge an ngaihtuah zel dawn tih erawh YMA te chuan kan hriatpui lo a ni.
Hemite thian zaho hi thilsual ti tura in thurual an niin an thil ruksa te pawh ei hovin an tlan tlang thin a, remruatna fel tak leh khawih tur bik neisa a kalchhuak an ni tlangpui thin.

--------------------------------------------------------------------------------------------------

CYMA Rethei tanpuina

Central YMA chuan Sub-Hqrs. YMA Champhai hnenah rethei zual tanpuina tur sum Rs 20000/- (sing hnih) a pe a. He tanpuina sum lokal hi Sub-Hqrs. huamchhunga Group YMA 8 ah sem nise tiin Sub-Hqrs. Executive Committee chuan a rel a. Group YMA tinten an huam theuh ah tanpuingai dik tak te hnenah lo sem turin an kuta dah turin thutlukna siam a ni a. Hetiang hian ruahmann a ni :
1. Tuipuiral Group YMA - Rs 5000/-
2. Rihdil Group YMA - Rs 2000/-
3. Vanapa Group YMA - Rs 2000/-
4. Khawzawl Group YMA - Rs 4000/-
5. Tuichangral ‘N’ Group YMA - Rs 2000/-
6. Kawlkulh Group YMA - Rs 2000/-
7. Tuiphal Group YMA - Rs 1500/-
8. Sialkal Group YMA - Rs 1500/-

--------------------------------------------------------------------------------------------------

Taitesena Section

Nimin khan Taitesena Section chuan Picnic cum Advance Chrismas chu Hringlangtlangah hlim takin hun an hmang a, member kal an thahnem hle. Tin, Section Secretary report pawh an thehlut fel tawh bawk.

Chawngbawla Section

Dt.13.12.2008 khan Chawngbawla Section te chuan committee an nei a, an section huamchhunga kum 60 chin chunglam mi 30 te hnenah a Krismas thilpek atan mawza lum an hlan. Kumin chhungin vengchhung nu leh pate, mi tlawmngai inpe te zarah Chawngbawla Section chuan hma nasa takin a sawn avangin lawmthu an sawi mawlh mawlh a ni.

--------------------------------------------------------------------------------------------------

OB meeting

Vawiin chawhnu inkhawm ban dar 3:00 PM hian YMA Hall-ah Branch OB te leh Section Leader leh Secretary te theuh thu pawimawh tak ngaihtuah ho tur a awm avangin kal theuh turin kan in hriattir ani.

--------------------------------------------------------------------------------------------------

Security

Security te Krismas leh kumthar vuakvet vela duty routine insiam in group 3 ah inthen a ni a, Group tinte duty hun tur pawh siam fel a ni. Security member te mahni duty hunah theuh kim taka chhuahkhawm thin ni sela, Ni 24 leh 31 zan ah phei chuan member zawng zawngte duty tur a ni. Member te tlawmngaia kan chhuah taihmak a ngai hle a, tunlai hian zantin hall-ah duty a chhuah khawm thin a ni a. Harsatna engemaw Security te punna chi reng rengah chuan Hall phone No. 234728 ah koh theih reng an ni.

--------------------------------------------------------------------------------------------------

Enkawltute Kamchhuak

Krismas thla a lo nih meuh chuan a boruak avangin zirlaite pawhin an zirlai an zir tha hlei thei tawh lova. Nu ho pawhin bawngin tlawm lan an ngaihtuah thei tak tak tawh lova. Chhungkaw thila rual awhna in an riulru a khat zo tawh zawk thin. Politician te pawhin Politics lam aiin fate rualawh hlauhna lamah an rilru an pe zawk bawk.
YMA chu tanpui ngaite tanpuitu anih angin Branch YMA pawhin vengchhunga tanpui ngaite tanpui leh turin a in buatsaih chho mek zel a, member te leh section lam te pawhin kan tihtur kan neih ang angte thawkin thahnemngai takin hma la zel ila, mipakhat tal tan thil tha engemaw tihsak thei turin tanlak a tul hle. Chu chu Krismas hmuah dan dik tak zawk chu a ni.
Kei ka ni intihna hlip thla a, rilru in ngaitlawmte hnenah Krismas tak a thleng thin. Chutiang mite chuan he hun ropui takah hian an huat zawng takte pawh remna chibai an buk a, an hmelmate hnenah ngei pawh duhsakna an hlan zawk thin ani. Chutiang ti ve thei tur chuan nang i rilru i siam ve thei em le?

------------------------------------------------------------------------------------------------------------------

Advertisement

Buhban fai chiahsa Kg 2 Rs 15 zelin Electric khawl hmangin kan deng hre thei a, tin Chow lei tur pawh kan nei e. A duh apiang tan order theih reng a ni bawk.

H.Vanlalhriata (T.Section)
Ph. : 234985
Kahrawt, Thlerpui.
Advertisement
Hnahlan Grape tui duh tan um khat Rs 120/- in lei tur a awm reng e.

Laldinghlui (Ch.Section)
Ph. : 9612320781

------------------------------------------------------------------------------------------------------------------

Pass thar

Kum 2008 MESLC/MSLC pass thar kan vengchhunga kan hriat theih te :
1) Hunruatsaka - II S/o Vanlalhuma
2) Lalkhawngaiha - III S/o Lalmuanpuia
3) Lalthansanga - III S/o Siamthanga
4) Jacoba Malsawmsaka - II S/o Ronald Lalfakzuala
5) Remlalhmachhuana - II S/o Lalthatlinga (L)
6) Lalthlamuani D/o Thanchhunga (L)

Pass thar zawng zawngte Branch YMA chuan kan lawmpui takzet a ni.

------------------------------------------------------------------------------------------------------------------

Lawmthu

Tunlai hian Dawrkaikawn chu Decoration Sub-Committee te chuan a chei hna an thawk mek a, hei hi veng hmel lanna pakhat anih avangin theihtawp chhuahin hah pawh sawi thei lovin thahnemngai takin an thawk chho zel a, an chungah lawmthu kan sawi a. Chhun zan zawma thawh tur a awm reng avangin hman remchan dan ang anga a thei apiangin puih an mamawh takzet a ni. A bikin nula te tan tihtur a tam hle. Tin, Pi Thanpuii te chhung chuan wire , holder leh bulb te kan mamawh ani tih hriain min hman tir avangin an chungah Branch YMA chuan lawmthu a sawi mawlh mawlh a ni.

------------------------------------------------------------------------------------------------------------------

Hal ral

Dt.17.12.2008 zing dar 7:00 AM khan Security te chuan an zu man sa an la kawl ang angte chu an halral.

------------------------------------------------------------------------------------------------------------------

Lawmpuina hlan

Kan member pui Tv.Biakthanpuia nupui neih lawmpui na leh Nl.Lalchhumpuii pasal neih lawmpui na atan Kahrawt Branch YMA chuan Rs 400/- ve ve in a hlan. Duhlai tuak tharte fanau maltluan chawia an awm dun zel theih nan duhsakna kan hlan bawk a ni.

------------------------------------------------------------------------------------------------------------------

Chanchinbu man pe fel

Chanchinbu chhut man kumin chhung atan pek fel a ni ta a, mipuite leh agent te chungah Kahrawtians Editorial Board chuan lawmthu a sawi a ni.

------------------------------------------------------------------------------------------------------------------

Hnatlang

Nimin khan Dawrkaikawn cheiin Branch hnatlang neih a ni a, member thawkchhuak erawh kan thehnem lo hle. Heng cheina kan dahte hi tute pawhin dim takin enkawlin naupang kuthlei lakah i veng tlang theuh ang u.

------------------------------------------------------------------------------------------------------------------

Silai lem

Naupang lawm silai lem a mu nei chi kenga khawlaia naupang vak vel hmuh tur an tam hle mai a. Hei hi YMA in a khap thil anih avangin nu leh pate pawhin kan fate hetiang lam thil hi leisak lo hram turin kan in ngen nawn leh a, a lo lei tawh te pawhin khawlaia keng chhuak lo turin kan in ngen a ni.

------------------------------------------------------------------------------------------------------------------

CH. R. B. Huang

% Rulling nih meuh chuan pipe wrench pawh kawmthlangah a thlawkthla vawng vawng mai...
- Tom Atea (K.Sec)
% Tun atang chuan Champhai Rahul Gandhi Tesanga ti hlirin min ko tawh dawn nia...
- TL Zinphur (K.Sec)
% Kan nu chu Tlani bulah ka mut tir tawp, a chhan chu kan chetsual a hlauhawm tlat.....
- Biaka (V.Sec)
% Kan tling leh ta lo....
- Bawla & Bcha

------------------------------------------------------------------------------------------------------------------

Krismas hlim taka in hman theuh theih nan duhsakna sangber kan hlan a che u.

-Editorial Board

--------------------------------------------------------------------------------------------------

Blog : www.kahrawtians.blogspot.com

Champhai Kahrawt Branch Y.M.A. Chanchinbu * Volume XVII * Issue No 50 * Date.7.12.2008

Kahrawt Branch YMA Executive Meeting Vawi 9-na Neih A Ni

Kahrawt Branch YMA Executive Committee Vawi 9 - na chu Dt. 5.12.2008 zan khan Kahrawt Branch YMA Hall ah neih a ni a. An rorel langsar zual deuh deuh te chu :

1. Kumtawp Members Meeting neih leh neih loh chungchang sawi ho a ni a, neih loh mai nise tih a ni.


2. Kum 2009 Kahrawt Branch YMA hruaitu thlan hun tur leh a thlan dan tur ngaihtuah a ni a, inthlan hun atan Dt.1.1.2009 Dar 12:00 ah YMA Hall ah neih nise tih a ni a. Nominate hranpa siam lovin Post by post a inthlan nise tih a ni a, post tina Vote hmu sang ber tlinga puan nise tih a ni.
Inthlanpui turin Senior Adviser te leh Sub-Headquarters YMA a kan Asst. Secretary te ruat an ni.
Returning Officer : Pu K. Vanlalzuata
Recording Secretary : Pu C. Vanlaldinga
Polling Officer : Pu B. Remmawia
Pu BP. Rosanga
Pu Damliana
Pu PB. Laltluanga
Pu Hrangthansiama Mizo

3. Kahrawtians Award sem dan tur chungchang sawi ho a ni a, a tehfung turte chu Branch OB ten tul leh tha an tih angin lo buaipuise tih a ni.


4. Krismas leh Kumthar vuakvetah Dawrkaikawn chei leh nise tih a ni a, a lo buaipui turin Decoration Sub-Committee te ruat an ni. An hmalakna senso atan Executive Committee chuan Rs 5000/- pek nise tih a ni.


5. Kumdanga tih thin tawh angin Krismas leh Kumthar denchhenin veng chhunga Damlo leh harsa zualte tanpuia kan leh nise tih a ni a, atul anga hma lo la turin Branch OB te ruat an ni.


6. Krismas leh a vuakvet ah Kahrawt vengchhungah Halpuah hal khap tlat a ni a, silai lem, a mu nei chite dawrkai ten zuar lo tur leh la lo tura ngen nise tih a ni a, naupang te pawhin khawlaiah silai lem a mu nei chi te ken chhuah khap nisela tin Information atanga mipuite hnena ngenna au ni se tih ani.

--------------------------------------------------------------------------------------------------

Gas Thuk Lei

Tunkar khan Branch YMA in chhiatni thatni a hman tur Gas thuk lian chi tha tak pakhat Pu R.Laldika Aizawl zin in a rawn lei thar leh ta, a hawh duh te tan hawh theih reng a ni.

--------------------------------------------------------------------------------------------------

In Report Tur

Kum 2008 chhunga damlo thisen petute zawng zawng Branch YMA Secretary hnenah a rang lama in report tura ngen leh hriattir kan ni a, record bu-ah ziah hmaih a awm a vangin hei hi ngaipawimawh theuh turin kan in ngen nawn leh ani.

--------------------------------------------------------------------------------------------------

Computer Keyboard Thar

Nimin zing khan Branch YMA computer keyboard hmanlai chu a hlui tawh em avangin a thar changkang tak Rs 550 in lei ani.

--------------------------------------------------------------------------------------------------

Vote Tlak Dan

MLA Election kan zo ta a, a tlangpui thuin vote a tla tha thawkhat hle. Hetiang hi Champhai khawchhunga vote tlak dan chu ani.
Champhai North ah voters 15338 awmin 12541 atla a hei hi za zelah 81.80 % ani a tin, Champhai South ah voters 14663 awmin 11615 a tla thunga hei hi za zelah 79.20 % ani. Champhai District bikah chuan vote tlak dan hi 81.62% a ni. Vote chhiar tuete hi training tha taka pek vek an ni a, venhimna tha tak hnuaiah vote hi Dt 8.12.2008 ah DC Office Keifang tlangah zing dar 7:00 atanga chhiar tan ani ang.

--------------------------------------------------------------------------------------------------

Naupang Zan Leng

Kumtawp Exam chawlh ani tawh a, naupang zan leng an tam thei hle. Nu leh pa ten kan fate sual kawng an zawh loh na turin zan len hi khuahkhirh deuh a tha khawp mai.

--------------------------------------------------------------------------------------------------

Enkawltute Kamchhuak

Kan ti nek nek a December thla kan hmang leh ta reng mai.Kumin phei chu MLA inthlan kum ani bawk a mipui rilruah Krismas lam a la leng vak lo. Tunge sawrkarna siam ang a, chumi bialah chuan tunge tling ang tih bakin ngaihtuahna a luah theilo ani ber mai. Tling kan awm anga tla pawh kan awm ngei mai dawn. Kan tan party an chak anih pawhin awmdan tawk kan thiam angai hle dawn a, chutih rualin a tlinglo lam pawhin a tlingate an chutih khatih vang a lawm ti a sawichhiat lama ramtang lovia kan in lawmpui thiam atul hle dawn ani.
YMA lam pawh kumthar hruaitu tur kan thlang leh dawn hnai tawh a. Ruahmanna pawh siam ani tan mek. Branch hruaitu thlan na mai a politics hnuk lut a, hruaitu nihna inchuh avanga YMA hming ti mawilo khawp a chet lak palh te pawh a awm thei. Heng lakah hian kan in ven fimkhur angai takzet a, veng dang ten a min rawn thlir dan tur ngaihtuah reng chungin veng tana kan thahnem ngaihnate kan tihlan thiam hi a hun tawh hle ani.
Hruaitu chak tawk lo kan tih leh mawng rit deuh thlak duh kan nei anih pawhin an thatlohna lai hmanga sawichhe vak vak a, mimal taka bei vak lovin mawi tak si mi rilru tina chuang silova tih dan kan zawn hram hram a tul hle ani. Chu chu mipuitling zia leh veng puitling zia tur zawk chu ani.
Inthlang dawn tih avanga YMA hming ti hliau zawng a hma kan la anih chuan kan veng hi kan la hmangaih tawk lo ani a tih theih ang. Chuvangin mawi tak leh hlim taka kan inthlan theih nan members zawng zawngte kan pawimawh dan a in ang vek ani.

--------------------------------------------------------------------------------------------------

Ngenna & Hriattirna

Kahrawt Branch YMA Executive Committee in a rel tawh angin vengchhungah halpuah zawrh leh hal, silai lem a mu nei chi zawrh leh lei te, Naupang khawlaia silai a mu nei chi te kenchhuah khap tlat a ni a, Nu leh pate pawhin kan fate hetiang thil leisak lo turin kan in ngen a. Hetiang ang tilui YMA duty ten an man anih chuan an chungchang thu hi ngaihtuah ani anga, an thutlukna chu engpawh nise an sawisel thei lovang.

--------------------------------------------------------------------------------------------------

Sporting Club

Kahrawt Sporting Club bungrua kawltu zawng zawngte chuan Pu K.Lalhmachhuana, President Kahrawt Sporting Club hnenah Dt.10.12.2008 ral hma a thehlut vek turin kan in ngenin kan in hriattir a ni.
Tin, Uniform la kawl zawng zawng te pawhin Pu B.Lalrinfela hnenah a rang lama thehluh vat tur a ni e.

Sd/-
Lalrotluanga
Secretary

--------------------------------------------------------------------------------------------------

Damlo

Pu B.Thangchhuaka leh Pu Piangliana te an mahni in lamah enkawl mek an ni. Branch YMA hruaituten kan in pawisa fai damlo kan na an hlan bawk. Damlo te an that leh thuai kan beisei.
Pu Fangzauva pawh Aizawl lama an inenkawl reng hnuin tha takin a lo haw leh ta a, kan lawmpui hle.

--------------------------------------------------------------------------------------------------

Advertisement

Krismas leh kumthar chho vel atana chhang deng duh te tan engtiklai pawhin chhang chiahsa keimahni inah Kg 2 cheng 15 in kan deng thei reng e. Min rawn pan ve teh u.

H.Lalhriata
Taitesena Section

--------------------------------------------------------------------------------------------------

Tlangau Hlawh

Tunlai hian tlangau hlawh khawm mek zel ani a, chhungtin te tlawmngaia lo pe zel turin kan in ngen a ni. Chutih rual chuan kan information line chiangkuan loh chang a awm leh zauh thin erawh pawi kan ti hle a mipuite hriatthiamna kan ngen nghal bawk a, a theih ang anga thuam that chhoh zel tum ani.

--------------------------------------------------------------------------------------------------

Prem. League fixture
Dec 7 (Sunday)

Everton Vs Aston Villa
W.Brom Vs Portsmouth

--------------------------------------------------------------------------------------------------

Serie-A
Dec 7 (Sunday)

Atalanta Vs Udinese
Cagliari Vs Palermo
Lecce Vs Juventus
Milan Vs Catania
Napoli Vs Siena
Reggina Vs Bologna
Torino Vs Fiorentina
Sampdoria Vs Genoa

--------------------------------------------------------------------------------------------------

CH. R. B

# Kei Lalruatsanga hian Valtea ni tawh lovin Mavalte-a tia min ko theuh tawh turin vengchhung mipuite ka hriattir e.

# Khawnge maw pa ho hi an in kawmkhawm thin le? pa ho tih lemah FAPA nei ho hi.
- Ramsanga (K.Sec)

# Ha thar ka nei leh ta tunah zet chuan FUMFE pawh a FUMFE chiang ta khawp mai.
- Pu Dikte-a (V.Pre)

--------------------------------------------------------------------------------------------------

Website : www.kahrawtians.blogspot.com

--------------------------------------------------------------------------------------------------

Roreltute hi Pathian ruat an ni tih pawm thei turin mahni theuh i lo in enfiah hmasa ang u.