Champhai Kahrawt Branch Y.M.A. Chanchinbu * Volume XVIII * Issue No 16 * Date. 19. 4. 2009

Corruption Do

-HK. Lalkunga. Vengsang

Kum 2005 MUP Gen. Assembly chuan Corruption do tih hi kumpuan atan alo rel tawh a. Hemi bawhzui tur hian Sub-Hqrs, Area, Unit tinah te Kohhran leh Chanchinbu thleng pawhin a tam thei ang bera puangzara tarlang tura tih kan ni a. Corruption hi kan tawng a nilo chungin keimahni tawng ang maia kan hman leh hriat a ni a. Sawifiahna awlsam dan ber chu Hlemhletna, eirukna tih leh thiltih chingpente ti ila a fiah mai awm e.
Kan ram Kristian ram ti a kan chhuan em em chu Corruption avangin kan buai zo ta a nih hi. Sawrkar sum a hman na tur hmuna hman a nih loh thin avangin mirethei kan rehei tual tual a, a then an lian tual tual a, mirethei leh hausa kar a hlain a zau tual tual a. Lal Isua kan rinna leh kan thlarau nun leh Kohhran thleng pawhin min eichhe mek zawng a nih hi. Bible pawhin kut tling lova hausa chu Varung mahni tuilo awmkeu ang mai a ni a, a vanglai takin a hausakna chuan a kalsan anga, a at zia ala lang mai ang a ti a. Hetiang hi kan Pathian thu chuan min zirtir dan a nisi a. Chuvangin Corruption chu engtinnge kan do ang a, Kohhran ho hian tan kan lak ang.
Milian leh mite angkhat renga awm tur kan nih laiin milian leh hausate kan in tlawn siak a, upa in thlengtlawrzuan an tih ang mai hian mihausa leh sum ngahte kan endan hi a dik tawk lo fo thin a. Enge a hausakna, mi an sum lak luh phu lovin intha, bungrawtha leh man tam changkang tak takte nei mahse, an hlawh phu lova khawsa an nih a, an sum lak luh dan aia nuam leh khawsa sangte hi kan tlawn mai tur a ni lova kan endawng ngam tur a ni.
Sorkarah khawtlang hmasawnna sum alo kala, kawng hrang hranga hmalakna turin lo neih, huan siamna, hriselna, khawtlang tan, chhungkaw tan, mimal tana heng sum lo kalte hi Department hrang hrangin a hmannna turah dik taka hman a nih a, a tul anga kalpui tur a nih laiin a tam zawk chu a hmanna tura hmang lovin a riral ta thin niin a lang.
Zawhna han in zawt ila engtinnge mi a eiru tih kan hriat theih ang. An sum lak luh leh an hlawh phu lova Babel in sang sate, bungraw man tam pui pui leh Motor engemaw zat neite hi kan chhut thiam a ngai. Chvangin ngun taka kan zir chuan he Zoram sualna lo hluar chho zel hi a zung kaihna bulpui ber chu Corruption hi a ni tih loh rual a ni lo. Ngun taka kan zir chuan Ruihhlo leh sualna dang lo punlun nate hi Corruption tih loh rual ani lo. Ruihhlo haw viau leh do taima takte hian Corruption do kawngah chuan kan tha a thum tlat thin. Hmeithai leh chhumchhia te hrem kan phur viau laiin Corruption avanga hausa leh awm theite kan ngaisang a, kan in ntlawn siak leh si hi chu kan tih tur a ni lovang. Chuvangin ringtute hian kan sum hman dan te hi Pathian duh zawng a ni angem tih hi ngun takin i in bih chiang ang u.

--------------------------------------------------------------------------------------------------

Property
1. Bungrua hawh tur chuan Property incharge te hnenah dilna ah theh lut hmasa anga, Chawkidar hriatpuina a lak chhuah chauh tur a ni bawk ang.

2. Bungraw hawh dahkir tur reng rengin Chawkidar awm lai ngeia dah luh tur a ni a, an awm loh laia dah luh a nih dawn chuan Property enkawl tute zinga pakhat tal in a enpui hnuah chauh dah luh tur a ni.

3. Bungrua reng reng a hawhtu/hmangtu ten an tibo/tichhia a nih chuan a tharin an thlak ngei tur a ni.

4. Veng chhunga Chhiatni bikah YMA hun chhung hawh theih a ni a, hawh zui ngai an neih chuan an hawh tur leh a zat fel taka ziakin bungraw enkawltute an hriattir tur a ni.( Tul bik thilah laksawn ngai a awm chuan lak sawn theih a ni ang.)

5. Lungphun, Innneih, Lawmthu sawi leh khawtlang huapah Nikhat leh Zankhat hawh man a awm lo anga, hemi hunchhung bak an hawh zui chuan hawh man pangngai in a kal thung ang.

6. Pawl/Mimal tan hawh man siam ang hian an hawh theih a ni. Nikhat leh zankhat bak hawh a nih chuan hawh man rate pangngai anga chhut chhoh zel tur a ni ang.

7. YMA Hall hi Vengchhung NGO te tan a thlawna hman theih a ni ang. An hmang dawn a nih pawhin hruaitute an hrilh hre hmasa thin tur a ni ang..

--------------------------------------------------------------------------------------------------

HSSLC Pass
1. Sadam Remruatfela (Sc) III
S/o Sanglianngura K. Sec

-------------------------------------------------------------------------------------------------

Khawtlang nun siam that
YMA General Conference chuan kumpuan neih loh nise tiin a rel a. Amaherawhchu, kan khawtlang nun a chhiat zel loh nan leh a chhe zel tur venna atan Khawtlang nun siam thatah a bika hma la turin CCC chuan a rel leh ta a ni a, hei hi chak taka kal pui a bawh zui hi thil tul tak niin a lang.
Khawtlang nun siamthat hian kan kumpuan tawh chi hrang hrang Ruihhlo do, Intodelh leh Ram leh hnam humhalh te kha a keng tel vek a. Tin, Khawtlang nun siamthat pawh hi Kumpuanah pawh kan nei tawh nghe nghe a ni. Henga Kumpuana kan neih tawh hi thlauh thla bik lovin a bika hmalakna tham vek a ni a. Hma hi nasa taka lak pawh a tul a ni.
Hetiang taka khawtlang nun siam that hi thil pawimawh a nih avangin kan hma zawn theuh ah chak takin hma lak a ngai a ni tih hriain kumpuan ang hiala hma lak hi kan tih tur a ni a. Ruihhlo lo lar thar leh ta te pawh hi kan khawtlang nun siamthat nana kan hmalakna hi a tih thuanawp avang hian heti lamah hian hma kan lak leh zual hi a tul hle niin a lang.

-------------------------------------------------------------------------------------------------

Siam zo
Thlanmuala Tuiluankawr kawng sira dah tura hnatlanga kan thawh chu VC ten lung remin thataka siam zawh a ni ta a. Kahrawt VC te chungah Branch chuan lawmthu a sawi a ni.

-------------------------------------------------------------------------------------------------

Social Audit
NREGS hnuaia in hlawhna ah Dt.20.4.2009 (Thawhtan) zing Dar 6:30 hian Social Audit Kahrawt YMA Hall ah neih tur a ni a. Hetah hian Chhungkaw aiawh Job Card a hming chuang ngeite chu kim taka kal vek tur a ni.

-------------------------------------------------------------------------------------------------

Zirlai Exam
Zirlai First Term Exam a hun leh ta a, thenkhatin an Exam mek bawk a. A tam zawk chuan Thawhtan lam hian an tan tawh dawn a ni a. Hemi a nih avang hian Zirlai rilru la buai thei zawnga bengchheng siam lo turin kan in ngen a ni.

-------------------------------------------------------------------------------------------------

Lawmawm
Nl C. Lalchhandami chuan mi nazawngin an theih loh chu kan mamawh anga min thawh sak avangin a chungah Branch chuan lawmthu a sawi tak meuh meuh a ni.

-------------------------------------------------------------------------------------------------

Pem
Pu K. Lalthangzauva te chhungkua Member Pali chu Vengsang atangin lo pemin Vanapa Section ah an awm mek a. Tin, Pi Kapzingi te chhungkua Member pali chu Saitual chawnpui veng atangin an rawn pemin Chawngbawla Section ah an awm mek a, an hnen atang hian pem lehkha fel tak dawn a ni.

-------------------------------------------------------------------------------------------------

Kaisang
Kan vengpa Pu TBC Rozara S/o Pu B. Sangkhuma chu Taxation Department ah Chief Commissioner ah kaisangin Kolkata ah a awm a, tunah hian a hna a zawm fel tawh a ni. A hnuaiah hian Commissioner panga paruk vel an awm dawn a ni. A ni hi Mizo zinga Chief Commissioner nithei pahnihna a ni.

-------------------------------------------------------------------------------------------------

Meeting dawn
Kahrawt Branch YMA Executive Committee chu Dt. 23.4.2009 hian neih tur a ni a, hetah hian Thlanmuala thlan lung hawi zawng chungchang leh Members Meeting neih tur chungchang ngaih tuah tur a ni a. Agenda neiturte chuan Secretary hnenah theh luh theih a ni.

-------------------------------------------------------------------------------------------------

## Kan tlawmngaihna kan lanchhuah tirna hun pawimawh ber pakhat lumen zana ei leh in kan in hlui dan hi a hun chhung a rei loh teh lul nen in siam that deuh theih dan a awm lawng maw.
- 9612521892

## Hun engemaw chen atang khan Pu Selthanga Bawng In ah mi thahnem ngaite hmalakna avangin Tawngtai Camp an nei a ni a. Hetah hian kan veng chhung atangin sawm chuang zet ruihtheih thilin a tih buai thinte, Pathian chhanchhuahna beiseia awm mek te hi Kohhran leh NGO bakah khawtlang angte a kan ngaih vena, tisa a an mawmawh hrang hrang an ei leh in turah a pe thei ten pek leh thlarau damna an lo chan ngei theihna tura tawngtai pui hi kan zavaia mawh phurhna a ni dawn lawm ni. - Masaia pa

-------------------------------------------------------------------------------------------------

## Chhuana ka Motor lei ve hi chu ‘Tartiang’ mai mai atana ka lei a nih ve mai mai hi. - Rinpuia (T. Sec)

## PWD kawngpui siam tharah tuman Ar chhuah loh tur an thai darh ang.

-------------------------------------------------------------------------------------------------

Editorial Board
Editor : K.L.Lalthangliana
Jt. Ed. : Zoherliana Hauchhum
News Ed : R.Malsawmdawngliana
Cir. Managers
Zarzoliana Fanai,
Romalsawma,
KVL.Hmangaihzuala
B. Lalngaizuala

-------------------------------------------------------------------------------------------------

RANCH O.B. 2009
President : R.Laldika
Vice President : Thanghuliana
Secretary : R. Malsawmdawngliana
Asst. Secretary : Zoherliana Hauchhum
Treasurer. : F.Lalhmachhuana
Fin.Secretary : C. Chawngthansanga

-------------------------------------------------------------------------------------------------

Thil thalo a ni tih kan hriat reng kan bansan theih miah si loh na hi mihring zia chu a ni!

Champhai Kahrawt Branch Y.M.A. Chanchinbu * Volume XVIII * Issue No 15 * Date. 12. 4. 2009

Ar hi sava a ni em ?

- Ruatpuia pa

Ar hi sava a ni em ? Tih zawhna hi Pu Vidtea (BC Academy) in a hun remchang ah min la rawn chhan sak theih chuan a lawmawm ngawt ang.
Kum 1990 kha a ni ta awm e. Zirtirtu ho Training Exam na pakhat atan Sikul pakhatah Practical Class kan nei thin a. Chuta zirlai ho te chu Naupang te te, kum 10-13 bawr vel vek an ni a. Vawikhat chu Zoram a nungchate chungchang ka sawi pui a. Mipanaupang pakhat leh hmeichhe naupang pakhat hi sava te zinga mawi an tih ber ka zawt a. Mipa naupang chuan, ‘Chawngzawng’ tiin min chhang a. Hmeichhe naupang zawk chuan ‘Choak’ tiin min chhang a. ‘Tunge sawi duh la nei? dingin han sawi teh u’ ka ti leh a. Mipa naupang hmel fel tak hi lo ding chhuakin, ‘Sir... ‘Ar’ a rawn ti a, kan nui ta dar dar a.
Khang naupangte min chhanna khan ngaihtuahna a ti thui thei khawp mai. Min chhang uang ani ang tih mai tur a ni a. Mahse an uang lo!! Aizawl khawpui chhunga Sava an hmuh phak tawk kha mawi an tih thu an sawi a, an hmuh phak tawk a tlem em a, chhanna dik tak min pe tlat a ni.
Tunah hian kan Champhai khawpui chhungah ngei pawh eng sava te nge kan la hmuh thin ? Sava chi hrang vak hmuh tur an vang ta hle mai. Choak tak ngial pawh kan hmu phak ta meuh lo. Chuvangin a awm chhun ang ang Chawngzawng, Vamur/Pengleng leh a dangte hi Air Gun leh Sairawkherh hmang te hian kapin, perh lo ila, Naupangte pawh ti lo turin zirtir ila. Puitling tan ngat phei chuan zahthlak tawp, zahmawh sawi tluka in ngaih tur a ni. Kan rama nungcha leh an chenna ram ngawte humhalh hi kan zavaia mawh phurhna a ni si a.

-------------------------------------------------------------------------------------------------

Hnatlang nei

Thlanmual rama Kawngpui phei chu VC hmasa ten min laih zauh sak in Tuiluan kawr hi kawnglaiah a awm phah ta a. Hei hi tuna kan VC ten min siam that sak dawn ta a. Tui kawng lai tha hian Ninga ni zing khan Branch hnatlang neih a ni a, Member 53 thawh chhuah a ni. Nimin zing khan hnatlang hi thawh chhun zawm leh a ni a, Member 31 an thawk chhuak leh a ni. Hnatlanga thawk chhuakte chungah Branch chuan lawmthu a sawi a ni.

-------------------------------------------------------------------------------------------------

Fakawm

Pu V. Kapthanga Vanapa Section chuan kum 20 chhung vel a ram anga alo enkawl tawh LPG Office kiang ami chu khawtlang tan phal takin a pe let leh a, hetiang mi inphal kan venga an awm hi a fakawmin a ropui hle a ni.

-------------------------------------------------------------------------------------------------

Theh lut rawh

YMA Sport neih a Sporting Club Kekawr bul hawh tu zinga mi pakhat la theh lut lo khan a rang thei ang berin Pu K. Lalhluna hnenah theh lut tura hriattir i ni.

-------------------------------------------------------------------------------------------------

HSSLC Pass thar

Kan hriat theih china HSSLC Pass thar te chu :
1. B. Lalrinfela I
S/o B. Thangchhuaka (L) K. Sec
(Computer Hardware Maintenance)

2. B. Lalhlimpuia I
S/o B. Remmawia K. Sec
(Auto Mobile Engineering)

3. K. Lalrotluanga I
S/o K. Khuangzika T. Sec
(Auto Mobile Engineering)

4. Andy Lalfakzuala Dist
S/o Lalthanzama V. Sec
(Auto Mobile Engineering)

5. C. Vanlalruata I
S/o C. Remkima T. Sec
(Auto Mobile Engineering)

6. Francis Lalnunpuia I
C/o C. Laldanga K. Sec
(Auto Mobile Engineering)

7. TBC. Lalthanmawia I
S/o B. Kailiana T. Sec
(Auto Mobile Engineering)

8. Lalzarzovi III (Arts)
C/o Lalngaisanga Varte Ch. Sec

9. Malsawmkima I (Arts)
C/o C. Vulthanga T. Sec

10. MZ. Ramthlengliana III (Sc)
C/o H. Rotanga Ch. Sec

11.Benjamin Lalmuanawma I (Sc)
S/o Dr HT Phosa V. Sec

12 B. Lalhlimpuia II (Sc)
S/o B. Thangchhuaka (L) K. Sec

B. Lalrinfela hi Computer Hardware Maintenance-ah Mizoram pumah pakhatna a ni a, Computer Hardwire a pass leh Auto Mobile Engineering a pass te hi BC English Academy a kal vek an ni a. BC School hi Mizoram ah Auto Mobile Engineering leh Computer Hardware Maintenance ah a ti tha ber an ni a, kan lawmpui hle.

-------------------------------------------------------------------------------------------------

Zirna

Kan hriat tlan theuh angin HSLC leh HSSLC Exam Result a chhuak ta a, kan veng atang pawhin Pass engemaw zat kan nei a, alawm awm hle. Chutih rualin kan result en hian kan veng atangin pass kan tlem lu deuh lo maw tih tur a ni.
YMA in kumpuanah vawi engemaw zat zirna uar kum a puang tawhin hma pawh nasa taka lak a niin kan veng pawh hian kan chhawr thin hle a. Tuna kan veng zirlai result en hian kan tha tawk lo hi enge a chhan ni ang. Nu leh pa mawh phurhna nge, YMA hruaitute nge, Kohhran lam zawk. Kan in ngaih tuah chian a ngai hle a ni. Kohhran leh YMA hian Activities kan ngah lutuk hian zirna hun tha kan siamsak tam thei lo nge ? Zirlaite hian an zir tha peih lo zawk? Zirna ah hma kan sawn theih nan kan zavaia in bihchian a tul hle niin a lang.

-------------------------------------------------------------------------------------------------

Branch aiawh dawn

Central YMA buatsaih Inter Branch YMA Sport May thla a Aizawla neih turah kan Branch aiawh in Marathon Race ah Tv. Laldinzuala S/o Lalneihthanga leh Tv. Lalrinfela S/o PC. Zamawia (L) Taitesena Section ve ve te chu an tel dawn a ni.

-------------------------------------------------------------------------------------------------

Damlo

Pu B. Lalnunmawia chu inlamah enkawl mek a ni a, Pu F. Chawngzinga chu Damdawiin lama zai a nihhnuin inlamah enkawl mek a ni. Pu Hmingdailova pawh Aizawl lama enkawl chhunzawm mek a ni a, Pi Laiziki chu damlohna avangin Pi Nubuangi in lamah enkawl mek a ni. Pi Thangzuali pawh Accident avangin in lamah enkawl chhoh mek a ni. Damlo te an that chhuah leh thuai kan duhsak e.

-------------------------------------------------------------------------------------------------

Lawmthu sawina

Ka nupui Tlangduhnimi’n Dta min boral san chungchangah YMA te, Nu leh pa leh thenawm khawveng min lainat tu zawng zawng te chungah lawmthu kan sawi a. Min lainata min khawngaihna leh tun thlenga kan khawhar hlaua min lenpui tute zawng zawng chungah lawmthu kan sawi a ni. Lalpa’n a let tam takin vur che u rawh se tih hi kan tawng taina a ni e.

In khawngaihna dawngtu

Lalrawna Chawngthu
leh a tu leh fate

-------------------------------------------------------------------------------------------------

Khap tlat a ni

YMA te hian Ramngaw leh Nungcha humhalh chungchangah hma ala renga. Kan hmalakna zah lova khawchhunga Chawngzawng veh a kah ching kan awm tih hriat ani a, tumah titawh lo turin kan in ngen a ni. Tin, Thlai chi thlak hun a ni chho leh ta a, chuvangin Ui leh Ar tumah pawnah chhuah lo turin kan in ngen nghal bawk a ni.

-------------------------------------------------------------------------------------------------

Chawngbawla Section

Ni 7.4.2009 zan khan Committee an nei a, an Section Leader Pu Lalramzauva Hrahsel chu hmun danga a awm avangin an in siam rema. Asst. Leader nilai Pu F. Vanlalchhuanga chu Leader ah dahin Asst. Leader atan Pu C. Lalhmangaihzuala chu ruat thar nghal a ni.

-------------------------------------------------------------------------------------------------

Kahrawt Welfare hruaitu

Kahrawt Welfare Committee 2009-2010 chhung hruaitu thlanna Dt 7.4.2009 zan khan Branch OB te kaihhruaina in an nei a, an thlan chhuahte chu:
Chairman : Pu K. Vanlalzuata
V.Chairman : Pu K. Lalhmachhuana
Secretary : Pu F. Lalrinnunga
Asst. Secy : Pu R. Lalzamliana
Treasurer : Pu H. Lalzawmliana
Fin.Secy : Pu Lalchhuanawma Fanai

-------------------------------------------------------------------------------------------------

## YMA leh Kohhrante kan thawk ho tha viau a. A lawmawm hle. Amaherawhchu, YMA leh Kohhrana a in hmang tawn te hian Activities ah lan kim vek zel a theih lohva, engemaw zawk chu thulh zawk an neih chang a awm thin. Hetianga a nih a, Kohhran lama an mawh an tih theih loh a, YMA lama kal an awm changa I thlarau nun kha ngaih tuah zawk rawh tih ching an awm leh thin hi chu sim ni thei se.A duhawm hle. YMA hi khawvel thil ta riau hian kan hria em ni le ? - 9612520911

-------------------------------------------------------------------------------------------------

## Lalkima Zote hi kei aia ang an awm chuanglo.
- Maruata (RV Tailoring)

## Vengthlang lam ah hian lenvah vel hi a nuam ber mai. Pa mah ni ila, khawvel a ti parmawi leh thin. - Sangpuia (T. Sec)

------------------------------------------------------------------------------------------------

Champhai Kahrawt Branch Y.M.A. Chanchinbu * Volume XVIII * Issue No 14 * Date. 5. 4. 2009

KHAWTLANG NUN SIAMTHAT

(Moral & Social Reform)

Huau huau lamah :Tunlai thangtharte hian engtinnge nupui fanau ka chawm anga, in leh lo ka din ang tih lam ngaihtuah ai chuan, huau huau lamah kan tlan a, Mizoram hi a awm ani tih hre ngai reng renglo, Manchester United, Arsenal, Chelsea fans-te chu awr phiar tawng tawngin kan inhnial peih a. TV a inkhel leh film duk dak manglo enin kan hun kan khawhral hnem lutuk a. Chhungte thawhchhuah sa a lei Bike leh Scooty vela he heu mai mai kan tam ta lutuk hian kan Social Life siam tha tura tan a ngaihzia min hriattir thin.
Chhungkua : Khawtlang nun siam tha tur chuan chhungkua a tan hi a pawimawh em em a. Kum 1972 a UT kan nih atanga sawrkar laipui atanga sum leh pai lo lut tam ta thut hian kan khawtlang nunah nghawng thalo tak a nei a. Sum leh paiah kan intlansiak nasat lutuk avangin thuneitute kan intlawn siak a. Dawt bill, Culvert thlawk thei leh vaivut lunga chantir thawm rite a lo awm ta nawk a. Kan fate chu sum leh pai um avangin kan enkawl hman lova, in lamah an duh duhin an lo awm a, sual tinreng an lo ti chho ta a ni. Chuvangin chhungtinte inngaihtuah thar leh a kan in siam that hian kan khawtlang nun pumpui hi siam that a lo ni dawn a ni. Chuvangin, kan khawtlang nun siam tha tur hian kan thalai rual awmkhawm ‘YMA in an ti tlat si a’ an tihte hian kan khawtlang nun siam tha tura theihtawp chhuah hi kan mawhphurhna leh a bata kan bat a ni.

-------------------------------------------------------------------------------------------------

Sub-Hqrs. aiawh

CYMA in Mizoram pum huap infiamna chi hrang hrang a buatsaih turah Sub-Hqrs. YMA Champhai aiawh a kal turin kan Branch atangin Laldinzuala leh Vanlalfela te chu Marathon Race ah thlan an ni.

------------------------------------------------------------------------------------------------

Chanchinbu man

Thla a lo thar leh ta a, chhungtinte chanchinbu man thahnemngai taka pe turin kan in ngen a, agent te pawh a man hi khawna theh lut nghal zel turin kan in ngen a ni.

-------------------------------------------------------------------------------------------------

Theh luh theih

Kahrawtians hi Zirtawp zana chhut thin a ni a, thuchhuah tur nei chuan hemi hma ngei hian theh luh thin tur a ni a. Thahnem ngai taka thu ziak turin leh Ngaihdan hi SMS leh ziak pawhin theh luh theih a ni.

-------------------------------------------------------------------------------------------------

Tanpuina hlan

Pu Selthanga huana Tawngtai Camp nei mekte chu Branch hmingin Buhfai Bag khat leh Nutrela Bag hnih chu hlan an ni.

-------------------------------------------------------------------------------------------------

Siam sak

Pu Rosiama in chu ruah leh thli in a tih chhiat avangin Dt.31.3.2009 khan V/C te leh YMA ten hnatlangin an siam that sak a. A in chung chhia hi CTU chuan rangva Bandle khat leh Riging pathum an tum sak a ni.

-------------------------------------------------------------------------------------------------

Kan lawmpui e

Pi B.Lalhlimpuii H/o Vanlalsiama Sailo (Ch.Sec) leh Nl. Zoherliani (T.Sec) te chuan Departmental exam-ah Assistant ah an tling thar a, hetianga kan vengin mi chhuanawm tak kan nei hi kan lawmpui hle.

-------------------------------------------------------------------------------------------------

Hruaitu hlun

MHIP Sub-Hqrs Conference Hnahlana neih zawh takah khan Pi H.Rohmingliani chuan MHIP hruaina kum 1999-2009 chhung chawl lova hruaitu anih avangin hruaitu hlun chawimawina a dawng.

-------------------------------------------------------------------------------------------------

HSLC Pass

J.Vanlalvena I (Sc)
S/o J.Lalremliana T.Sec

-------------------------------------------------------------------------------------------------

In report tur

Kum 2008 chhunga Kahrawt vengchhunga thlai thar zat sawrkarin hriat a duh avangin Dt.12.4.2009 ral hma ngeiin mahni hnaih ber VC hnenah in report tur a ni a, chungte chu : Sapthei, Grape, Serthlum, Sawhthing, Aieng, Hmarchate, Zikhlum, Feren antam, Alu, Carrot, Rose te a ni.

-------------------------------------------------------------------------------------------------

Card siam theih

Sawrkar kum alo thar leh ta a, PHE tui Point atanga tui dawng duh turte chuan Ni 8.4.2009 (Nilai) hian Kahrawt veng tan bik tui Card PHE Office ah siam thar tir tur a ni a, tui Card hi April atanga September thla thleng atan siam tur a ni ang. Chhungkaw Member 1-5 awmte tan Rs 65/- ani a, Chhungkaw Member 6-10 awmte tan Rs 125/- leh Chhungkaw Member 11 chin chunglam tan Rs 185/- ken tur a ni a. Tui Card keng tur chuan an Card hlui ken tur a ni a, a nei lo chuan mahni Ration Card ken tur a ni ang.

-------------------------------------------------------------------------------------------------

Chhiatni fund

Chhiatni fund tun thlenga la pelo zawng zawng ten April thla ral hma ngeia pe vek tura ngen kan ni a. La pe lo zawng zawng ten ngai pawimawh turin kan in ngen a ni.

-------------------------------------------------------------------------------------------------

Tlawmngaihna

Kahrawt Branch YMA hi Zoram pumah ber kanni tih turin Kum puan hrang hrangah lawm man pakhatna kan la thin a, Zoramah pawh kan hming a lang a nih kha. Khatih hun lai khan kan Branch pawh kan chak hle a, hmalakna hrang hrangah a ber kan ni kan ti thei hial awm e.
Zoram khawvela hming lang thin kha tun hnai mai atang khan kan hming hi a dai tan ta hle a. Thlan laih ah tak ngial pawh mi sawmhnih bawr vel lek te kan ni ta a, hei hi engvang nge ni ta ang. Kan tlawmngaihna hi a dal zo ta em ni le. Hnatlang ah nise mi sawm bawr vel kan kal chuan kal tha kan inti ta viau mai te hi enge a chhan kan in ngaihtuah chian a ngai hle a ni.
Kan tlawmngaihna hi kan ngaih tuah chian a ngai hle a, YMA chetchanna ah hian kan kal tha peih lo a nih pawhin kan Mizo tlawm ngaihna thlan laih leh thil dang dangah tal hi chuan theih tawp chhuah a, kan Mizo tlawmngaihna a bo loh nana hma kan lak hi YMA Member te hian kan tih tur a ni tih kan hriat thar a tha awm e.

-------------------------------------------------------------------------------------------------

Sub-Hqrs YMA

Dt.1.4.2009 khan Inter District a tel tur Qualifying Round a tlingte tana hmalak zui zel dan tur thlirin Sub-Hqrs OB, Sport Sub-Committee OB, Tug of War, Volley Ball, Athletic hruaitute leh Qualifying Round a tling Branch aiawhte YMA Office Tlangrawtah Meeting neih a ni a. Mahni Branch theuh pawisa hi in tum a ngaih dawn avangin a kal thei turte chu kal ngei tha an tih rualin hemi chungchang thlir nawn hian Dt.11.4.2009 (Inrinni) hian Committe neih leh nise an ti.

-------------------------------------------------------------------------------------------------

CYMA Chanchinbu

Vanapa Section huam chhunga Sub-Agent Nl.K.Lalliantluangi leh Nl Lalruatkimi te bial atanga Central YMA Chanchinbu latu te :
JC.Sawinghinglova, Hmangaih- tluanga, lalthankimi, Biaktluangi, HL.Malsawma, Thangseia, K.Pa- chhunga, Lalruatsanga, R.Lalngaih- thangi, Lalbiakmuana, R.Lalhming- thanga, F.Lalrinawma, Lalhluzuala, Lalduhkima, Lalramsanga, Zacham liana, Kapthuama, B.Lallawmkima, C.Lalhmunliana, Thuamliana Pudaite, Chalhmingthanga, S.Za- thansanga, R.Lalrinsanga, Lalduh- awma, B.Sangkhuma, Dr.HT.Phosa, P.Lalhmingliana, Manasia Lalduh- saka, Vanlalzawma, David Thang- luaia, VLMS.Dawngliana, NC.- Langa, R.Laldika, B.Lalramngheta, Biakthanpuia, Rochungnunga, Lalmuankima, Lalchungnunga, Sapchhawna, F.Laldingliana, F.Aithuama, F.Lalremruata, Lalthansiama, H.Lalzawmliana, Avuana, Zosangpuii, Vanlalvena, C.Lalrinngheti, K.Lalrammawia, Biaknghinglova, J.Khawhluna, R.Lalropuii, Dr.C.Vanlalhlua, Easter L.Chinzah, Salthuama

-------------------------------------------------------------------------------------------------

Lawmthu sawina

3rd Inter District Women Hockey Association Tournament a lokal, Aizawl District te Kahrawt veng mipui leh YMA hruaitute chungah kan lawm takzet a. Min lo mikhual dan hi entawn tlak kan ti a, mimal tin leh chhungkaw tin hnenah lawmthu kan sawi seng lova, hei hi kan lawmthu sawina a min ngaihsak turin ka ngen a che u.


Lalruatkimi
Coach
Aizawl District

-------------------------------------------------------------------------------------------------

## Pu Hmingsanga, (T.Sec) puanthuah khai meuhva khawhar ina nupui fanaute kalsan a i riak thin hi ka chhuang takmeuh meuh che a ni. Tv.Rothangliana Dt.26 zinga thlan lai tura i kal hmasaber kha i fakawm in ka chhuang takzet che a ni. - 9862430326

-------------------------------------------------------------------------------------------------

Advertisement

Vengdang pan buai ngai lovin TBC Drug Store, Dawrkaikawnah Damdawi chitin tlawm taka lei tur a awm reng e.
Tin, Bawnghnute duh tan litre 1 Rs.30 zelin Pu Hrangsavunga hnenah lei tur a awm reng bawk e.

-------------------------------------------------------------------------------------------------

## Kan Pastor leh Pu C.Sangthuama’n Siama in sakah min lawm tawh bawk a, Kohhran hnatlangah Zopui, Chhuana, Sawmte kan thawh ve ngei a ngai ang. - Pa Thaua

## Dar 11 thleng vel bak zawng... Tlaimah var ila kan in ning chuang lawng nge Hl. - BCA (V. Sec)

-------------------------------------------------------------------------------------------------

Lawmte kan lawmpui theih lohna lai tak hi mihring ze diktak lo lan chhuahna a ni