Champhai Kahrawt Branch Y.M.A. Chanchinbu * Volume XVII * Issue No 52 * Date.21.12.2008

Dawr rawk ching man

Dt.18.12.2008 zing lam dar 3:00 vel khan Upa K.Vanlalrova dawr Kahrawt KTP In chu ventilation bar karchhiain ,Vanlaldinmawia (15) S/o Hrangkunga Kahrawt leh a thianpa Benjamin Lalvenzuala (13) S/o Ramenga Vengthlang ten an rawk a, Laldinmawia hi dawr chhungah man a niin Lalvenzuala erawh a tlanchhia a, man zui lehnghal a ni.YMA hall-ah thu zawhfiah an niin an ni pahnih bakah hian an thurualpui thin Vanlalhriata (14) S/o F.Ramthanga Kahrawt an nei bawk.
Security hnena an inpuan danin September thla khan Pu R.Lalruala Liana veng ami dawr chu an pathum hian an rawk a. October thla khan Pi Lalbiakmawii Kahrawt dawr rawk lehin October thla tawp lamah Pi Hranghnuni dawr Vengsang KTP in chu an rawk leh a ni, November ni 19 khan Pi Mamawii dawr hi an rawk nawn leh a. November ni 23 zing khan Pi Sawmthangi Dawrkaikawna mi dawr chu rawk lehin December ni 4 khan Pu J.Ralkulhtawna dawr Vengsang Biak In bul ami an rawk leh bawk.
An chet hun hi zing lam dar 3-4 vel a ni tlangpui a, exercise la tur anga in sawm khawmin a hma nia rawk tura an lo rel lawk tawh dawrte an rawk thin. Thil lian tham tak lak erawh an nei ngailo in nepnawi leh eichawp thil an la tlangpui thin a ni.
Laldinmawia’n amah insawi thiam nana Security tena an vuak nat em avanga a tih loh pui ti anga inpuanga a insawi hi thu diklo a ni a. A thiante zawng zawng an inpuan hnu vekah pawh dawta a tan tlat avanga kut tuar zawk a ni. An ni pathum hi hun engemaw ti chhung chu hall-ah zan dar 7:00 PM a in report thin tura tih an ni a. An chungchang thu erawh hi chu an rawk dawr neituten engtiang in nge an ngaihtuah zel dawn tih erawh YMA te chuan kan hriatpui lo a ni.
Hemite thian zaho hi thilsual ti tura in thurual an niin an thil ruksa te pawh ei hovin an tlan tlang thin a, remruatna fel tak leh khawih tur bik neisa a kalchhuak an ni tlangpui thin.

--------------------------------------------------------------------------------------------------

CYMA Rethei tanpuina

Central YMA chuan Sub-Hqrs. YMA Champhai hnenah rethei zual tanpuina tur sum Rs 20000/- (sing hnih) a pe a. He tanpuina sum lokal hi Sub-Hqrs. huamchhunga Group YMA 8 ah sem nise tiin Sub-Hqrs. Executive Committee chuan a rel a. Group YMA tinten an huam theuh ah tanpuingai dik tak te hnenah lo sem turin an kuta dah turin thutlukna siam a ni a. Hetiang hian ruahmann a ni :
1. Tuipuiral Group YMA - Rs 5000/-
2. Rihdil Group YMA - Rs 2000/-
3. Vanapa Group YMA - Rs 2000/-
4. Khawzawl Group YMA - Rs 4000/-
5. Tuichangral ‘N’ Group YMA - Rs 2000/-
6. Kawlkulh Group YMA - Rs 2000/-
7. Tuiphal Group YMA - Rs 1500/-
8. Sialkal Group YMA - Rs 1500/-

--------------------------------------------------------------------------------------------------

Taitesena Section

Nimin khan Taitesena Section chuan Picnic cum Advance Chrismas chu Hringlangtlangah hlim takin hun an hmang a, member kal an thahnem hle. Tin, Section Secretary report pawh an thehlut fel tawh bawk.

Chawngbawla Section

Dt.13.12.2008 khan Chawngbawla Section te chuan committee an nei a, an section huamchhunga kum 60 chin chunglam mi 30 te hnenah a Krismas thilpek atan mawza lum an hlan. Kumin chhungin vengchhung nu leh pate, mi tlawmngai inpe te zarah Chawngbawla Section chuan hma nasa takin a sawn avangin lawmthu an sawi mawlh mawlh a ni.

--------------------------------------------------------------------------------------------------

OB meeting

Vawiin chawhnu inkhawm ban dar 3:00 PM hian YMA Hall-ah Branch OB te leh Section Leader leh Secretary te theuh thu pawimawh tak ngaihtuah ho tur a awm avangin kal theuh turin kan in hriattir ani.

--------------------------------------------------------------------------------------------------

Security

Security te Krismas leh kumthar vuakvet vela duty routine insiam in group 3 ah inthen a ni a, Group tinte duty hun tur pawh siam fel a ni. Security member te mahni duty hunah theuh kim taka chhuahkhawm thin ni sela, Ni 24 leh 31 zan ah phei chuan member zawng zawngte duty tur a ni. Member te tlawmngaia kan chhuah taihmak a ngai hle a, tunlai hian zantin hall-ah duty a chhuah khawm thin a ni a. Harsatna engemaw Security te punna chi reng rengah chuan Hall phone No. 234728 ah koh theih reng an ni.

--------------------------------------------------------------------------------------------------

Enkawltute Kamchhuak

Krismas thla a lo nih meuh chuan a boruak avangin zirlaite pawhin an zirlai an zir tha hlei thei tawh lova. Nu ho pawhin bawngin tlawm lan an ngaihtuah thei tak tak tawh lova. Chhungkaw thila rual awhna in an riulru a khat zo tawh zawk thin. Politician te pawhin Politics lam aiin fate rualawh hlauhna lamah an rilru an pe zawk bawk.
YMA chu tanpui ngaite tanpuitu anih angin Branch YMA pawhin vengchhunga tanpui ngaite tanpui leh turin a in buatsaih chho mek zel a, member te leh section lam te pawhin kan tihtur kan neih ang angte thawkin thahnemngai takin hma la zel ila, mipakhat tal tan thil tha engemaw tihsak thei turin tanlak a tul hle. Chu chu Krismas hmuah dan dik tak zawk chu a ni.
Kei ka ni intihna hlip thla a, rilru in ngaitlawmte hnenah Krismas tak a thleng thin. Chutiang mite chuan he hun ropui takah hian an huat zawng takte pawh remna chibai an buk a, an hmelmate hnenah ngei pawh duhsakna an hlan zawk thin ani. Chutiang ti ve thei tur chuan nang i rilru i siam ve thei em le?

------------------------------------------------------------------------------------------------------------------

Advertisement

Buhban fai chiahsa Kg 2 Rs 15 zelin Electric khawl hmangin kan deng hre thei a, tin Chow lei tur pawh kan nei e. A duh apiang tan order theih reng a ni bawk.

H.Vanlalhriata (T.Section)
Ph. : 234985
Kahrawt, Thlerpui.
Advertisement
Hnahlan Grape tui duh tan um khat Rs 120/- in lei tur a awm reng e.

Laldinghlui (Ch.Section)
Ph. : 9612320781

------------------------------------------------------------------------------------------------------------------

Pass thar

Kum 2008 MESLC/MSLC pass thar kan vengchhunga kan hriat theih te :
1) Hunruatsaka - II S/o Vanlalhuma
2) Lalkhawngaiha - III S/o Lalmuanpuia
3) Lalthansanga - III S/o Siamthanga
4) Jacoba Malsawmsaka - II S/o Ronald Lalfakzuala
5) Remlalhmachhuana - II S/o Lalthatlinga (L)
6) Lalthlamuani D/o Thanchhunga (L)

Pass thar zawng zawngte Branch YMA chuan kan lawmpui takzet a ni.

------------------------------------------------------------------------------------------------------------------

Lawmthu

Tunlai hian Dawrkaikawn chu Decoration Sub-Committee te chuan a chei hna an thawk mek a, hei hi veng hmel lanna pakhat anih avangin theihtawp chhuahin hah pawh sawi thei lovin thahnemngai takin an thawk chho zel a, an chungah lawmthu kan sawi a. Chhun zan zawma thawh tur a awm reng avangin hman remchan dan ang anga a thei apiangin puih an mamawh takzet a ni. A bikin nula te tan tihtur a tam hle. Tin, Pi Thanpuii te chhung chuan wire , holder leh bulb te kan mamawh ani tih hriain min hman tir avangin an chungah Branch YMA chuan lawmthu a sawi mawlh mawlh a ni.

------------------------------------------------------------------------------------------------------------------

Hal ral

Dt.17.12.2008 zing dar 7:00 AM khan Security te chuan an zu man sa an la kawl ang angte chu an halral.

------------------------------------------------------------------------------------------------------------------

Lawmpuina hlan

Kan member pui Tv.Biakthanpuia nupui neih lawmpui na leh Nl.Lalchhumpuii pasal neih lawmpui na atan Kahrawt Branch YMA chuan Rs 400/- ve ve in a hlan. Duhlai tuak tharte fanau maltluan chawia an awm dun zel theih nan duhsakna kan hlan bawk a ni.

------------------------------------------------------------------------------------------------------------------

Chanchinbu man pe fel

Chanchinbu chhut man kumin chhung atan pek fel a ni ta a, mipuite leh agent te chungah Kahrawtians Editorial Board chuan lawmthu a sawi a ni.

------------------------------------------------------------------------------------------------------------------

Hnatlang

Nimin khan Dawrkaikawn cheiin Branch hnatlang neih a ni a, member thawkchhuak erawh kan thehnem lo hle. Heng cheina kan dahte hi tute pawhin dim takin enkawlin naupang kuthlei lakah i veng tlang theuh ang u.

------------------------------------------------------------------------------------------------------------------

Silai lem

Naupang lawm silai lem a mu nei chi kenga khawlaia naupang vak vel hmuh tur an tam hle mai a. Hei hi YMA in a khap thil anih avangin nu leh pate pawhin kan fate hetiang lam thil hi leisak lo hram turin kan in ngen nawn leh a, a lo lei tawh te pawhin khawlaia keng chhuak lo turin kan in ngen a ni.

------------------------------------------------------------------------------------------------------------------

CH. R. B. Huang

% Rulling nih meuh chuan pipe wrench pawh kawmthlangah a thlawkthla vawng vawng mai...
- Tom Atea (K.Sec)
% Tun atang chuan Champhai Rahul Gandhi Tesanga ti hlirin min ko tawh dawn nia...
- TL Zinphur (K.Sec)
% Kan nu chu Tlani bulah ka mut tir tawp, a chhan chu kan chetsual a hlauhawm tlat.....
- Biaka (V.Sec)
% Kan tling leh ta lo....
- Bawla & Bcha

------------------------------------------------------------------------------------------------------------------

Krismas hlim taka in hman theuh theih nan duhsakna sangber kan hlan a che u.

-Editorial Board

--------------------------------------------------------------------------------------------------

Blog : www.kahrawtians.blogspot.com

Champhai Kahrawt Branch Y.M.A. Chanchinbu * Volume XVII * Issue No 50 * Date.7.12.2008

Kahrawt Branch YMA Executive Meeting Vawi 9-na Neih A Ni

Kahrawt Branch YMA Executive Committee Vawi 9 - na chu Dt. 5.12.2008 zan khan Kahrawt Branch YMA Hall ah neih a ni a. An rorel langsar zual deuh deuh te chu :

1. Kumtawp Members Meeting neih leh neih loh chungchang sawi ho a ni a, neih loh mai nise tih a ni.


2. Kum 2009 Kahrawt Branch YMA hruaitu thlan hun tur leh a thlan dan tur ngaihtuah a ni a, inthlan hun atan Dt.1.1.2009 Dar 12:00 ah YMA Hall ah neih nise tih a ni a. Nominate hranpa siam lovin Post by post a inthlan nise tih a ni a, post tina Vote hmu sang ber tlinga puan nise tih a ni.
Inthlanpui turin Senior Adviser te leh Sub-Headquarters YMA a kan Asst. Secretary te ruat an ni.
Returning Officer : Pu K. Vanlalzuata
Recording Secretary : Pu C. Vanlaldinga
Polling Officer : Pu B. Remmawia
Pu BP. Rosanga
Pu Damliana
Pu PB. Laltluanga
Pu Hrangthansiama Mizo

3. Kahrawtians Award sem dan tur chungchang sawi ho a ni a, a tehfung turte chu Branch OB ten tul leh tha an tih angin lo buaipuise tih a ni.


4. Krismas leh Kumthar vuakvetah Dawrkaikawn chei leh nise tih a ni a, a lo buaipui turin Decoration Sub-Committee te ruat an ni. An hmalakna senso atan Executive Committee chuan Rs 5000/- pek nise tih a ni.


5. Kumdanga tih thin tawh angin Krismas leh Kumthar denchhenin veng chhunga Damlo leh harsa zualte tanpuia kan leh nise tih a ni a, atul anga hma lo la turin Branch OB te ruat an ni.


6. Krismas leh a vuakvet ah Kahrawt vengchhungah Halpuah hal khap tlat a ni a, silai lem, a mu nei chite dawrkai ten zuar lo tur leh la lo tura ngen nise tih a ni a, naupang te pawhin khawlaiah silai lem a mu nei chi te ken chhuah khap nisela tin Information atanga mipuite hnena ngenna au ni se tih ani.

--------------------------------------------------------------------------------------------------

Gas Thuk Lei

Tunkar khan Branch YMA in chhiatni thatni a hman tur Gas thuk lian chi tha tak pakhat Pu R.Laldika Aizawl zin in a rawn lei thar leh ta, a hawh duh te tan hawh theih reng a ni.

--------------------------------------------------------------------------------------------------

In Report Tur

Kum 2008 chhunga damlo thisen petute zawng zawng Branch YMA Secretary hnenah a rang lama in report tura ngen leh hriattir kan ni a, record bu-ah ziah hmaih a awm a vangin hei hi ngaipawimawh theuh turin kan in ngen nawn leh ani.

--------------------------------------------------------------------------------------------------

Computer Keyboard Thar

Nimin zing khan Branch YMA computer keyboard hmanlai chu a hlui tawh em avangin a thar changkang tak Rs 550 in lei ani.

--------------------------------------------------------------------------------------------------

Vote Tlak Dan

MLA Election kan zo ta a, a tlangpui thuin vote a tla tha thawkhat hle. Hetiang hi Champhai khawchhunga vote tlak dan chu ani.
Champhai North ah voters 15338 awmin 12541 atla a hei hi za zelah 81.80 % ani a tin, Champhai South ah voters 14663 awmin 11615 a tla thunga hei hi za zelah 79.20 % ani. Champhai District bikah chuan vote tlak dan hi 81.62% a ni. Vote chhiar tuete hi training tha taka pek vek an ni a, venhimna tha tak hnuaiah vote hi Dt 8.12.2008 ah DC Office Keifang tlangah zing dar 7:00 atanga chhiar tan ani ang.

--------------------------------------------------------------------------------------------------

Naupang Zan Leng

Kumtawp Exam chawlh ani tawh a, naupang zan leng an tam thei hle. Nu leh pa ten kan fate sual kawng an zawh loh na turin zan len hi khuahkhirh deuh a tha khawp mai.

--------------------------------------------------------------------------------------------------

Enkawltute Kamchhuak

Kan ti nek nek a December thla kan hmang leh ta reng mai.Kumin phei chu MLA inthlan kum ani bawk a mipui rilruah Krismas lam a la leng vak lo. Tunge sawrkarna siam ang a, chumi bialah chuan tunge tling ang tih bakin ngaihtuahna a luah theilo ani ber mai. Tling kan awm anga tla pawh kan awm ngei mai dawn. Kan tan party an chak anih pawhin awmdan tawk kan thiam angai hle dawn a, chutih rualin a tlinglo lam pawhin a tlingate an chutih khatih vang a lawm ti a sawichhiat lama ramtang lovia kan in lawmpui thiam atul hle dawn ani.
YMA lam pawh kumthar hruaitu tur kan thlang leh dawn hnai tawh a. Ruahmanna pawh siam ani tan mek. Branch hruaitu thlan na mai a politics hnuk lut a, hruaitu nihna inchuh avanga YMA hming ti mawilo khawp a chet lak palh te pawh a awm thei. Heng lakah hian kan in ven fimkhur angai takzet a, veng dang ten a min rawn thlir dan tur ngaihtuah reng chungin veng tana kan thahnem ngaihnate kan tihlan thiam hi a hun tawh hle ani.
Hruaitu chak tawk lo kan tih leh mawng rit deuh thlak duh kan nei anih pawhin an thatlohna lai hmanga sawichhe vak vak a, mimal taka bei vak lovin mawi tak si mi rilru tina chuang silova tih dan kan zawn hram hram a tul hle ani. Chu chu mipuitling zia leh veng puitling zia tur zawk chu ani.
Inthlang dawn tih avanga YMA hming ti hliau zawng a hma kan la anih chuan kan veng hi kan la hmangaih tawk lo ani a tih theih ang. Chuvangin mawi tak leh hlim taka kan inthlan theih nan members zawng zawngte kan pawimawh dan a in ang vek ani.

--------------------------------------------------------------------------------------------------

Ngenna & Hriattirna

Kahrawt Branch YMA Executive Committee in a rel tawh angin vengchhungah halpuah zawrh leh hal, silai lem a mu nei chi zawrh leh lei te, Naupang khawlaia silai a mu nei chi te kenchhuah khap tlat a ni a, Nu leh pate pawhin kan fate hetiang thil leisak lo turin kan in ngen a. Hetiang ang tilui YMA duty ten an man anih chuan an chungchang thu hi ngaihtuah ani anga, an thutlukna chu engpawh nise an sawisel thei lovang.

--------------------------------------------------------------------------------------------------

Sporting Club

Kahrawt Sporting Club bungrua kawltu zawng zawngte chuan Pu K.Lalhmachhuana, President Kahrawt Sporting Club hnenah Dt.10.12.2008 ral hma a thehlut vek turin kan in ngenin kan in hriattir a ni.
Tin, Uniform la kawl zawng zawng te pawhin Pu B.Lalrinfela hnenah a rang lama thehluh vat tur a ni e.

Sd/-
Lalrotluanga
Secretary

--------------------------------------------------------------------------------------------------

Damlo

Pu B.Thangchhuaka leh Pu Piangliana te an mahni in lamah enkawl mek an ni. Branch YMA hruaituten kan in pawisa fai damlo kan na an hlan bawk. Damlo te an that leh thuai kan beisei.
Pu Fangzauva pawh Aizawl lama an inenkawl reng hnuin tha takin a lo haw leh ta a, kan lawmpui hle.

--------------------------------------------------------------------------------------------------

Advertisement

Krismas leh kumthar chho vel atana chhang deng duh te tan engtiklai pawhin chhang chiahsa keimahni inah Kg 2 cheng 15 in kan deng thei reng e. Min rawn pan ve teh u.

H.Lalhriata
Taitesena Section

--------------------------------------------------------------------------------------------------

Tlangau Hlawh

Tunlai hian tlangau hlawh khawm mek zel ani a, chhungtin te tlawmngaia lo pe zel turin kan in ngen a ni. Chutih rual chuan kan information line chiangkuan loh chang a awm leh zauh thin erawh pawi kan ti hle a mipuite hriatthiamna kan ngen nghal bawk a, a theih ang anga thuam that chhoh zel tum ani.

--------------------------------------------------------------------------------------------------

Prem. League fixture
Dec 7 (Sunday)

Everton Vs Aston Villa
W.Brom Vs Portsmouth

--------------------------------------------------------------------------------------------------

Serie-A
Dec 7 (Sunday)

Atalanta Vs Udinese
Cagliari Vs Palermo
Lecce Vs Juventus
Milan Vs Catania
Napoli Vs Siena
Reggina Vs Bologna
Torino Vs Fiorentina
Sampdoria Vs Genoa

--------------------------------------------------------------------------------------------------

CH. R. B

# Kei Lalruatsanga hian Valtea ni tawh lovin Mavalte-a tia min ko theuh tawh turin vengchhung mipuite ka hriattir e.

# Khawnge maw pa ho hi an in kawmkhawm thin le? pa ho tih lemah FAPA nei ho hi.
- Ramsanga (K.Sec)

# Ha thar ka nei leh ta tunah zet chuan FUMFE pawh a FUMFE chiang ta khawp mai.
- Pu Dikte-a (V.Pre)

--------------------------------------------------------------------------------------------------

Website : www.kahrawtians.blogspot.com

--------------------------------------------------------------------------------------------------

Roreltute hi Pathian ruat an ni tih pawm thei turin mahni theuh i lo in enfiah hmasa ang u.

Champhai Kahrawt Branch Y.M.A. Chanchinbu * Volume XVII * Issue No 48 * Date.23.11.2008

Sub-Hqrs. YMA Champhai Inthlan Thuchah

Sub-Hqrs.YMA Champhai chuan kan hma lawka MLA inthlan kan neih turah mipuite hnenah ngenna thuchah a siam a, chungte chu :
1. India khua leh tui kan nihna lantir turin mitin ten rilru thianghlim leh ngaihtuahna zalen tak chunga ram rorel tura kan mi duh thlang (Vote) theuh turin.
2. Inthlanna neih chhungin danin a phal bak sum leh pai seng lo tur leh campaign ruaitheh buatsaih lo turin.
3. Inthlan campaign laiin mipui tichiai zawng leh vantlang tana bengchheng lutuka aurinna hmang lo turin.
4. Khawlai dung leh vantlang hmunte tihmelhem khawpa Party flag leh banner te tar lo turin.
5. Hel leh ralthuam hmanga inrikrapna a awm lohna turin eng party mahin hetianga ngaih theihte hmanrua a hmang lo turin.
6. Ram leh khawltang tana tha leh hmasawnna, tihhlawhtlin theih ngei turte chauh mipuia tlangzarh turin Party tin candidate te kan ngen bawk a ni.

--------------------------------------------------------------------------------------------------

Branch O/B Meeting

Dt.21.11.2008 zan dar 6:30 khan Branch O/B meeting neih a ni a, MLA Election Dt.2.12.2008 a neih turah tlawmngaia Kahrawt Booth I & II a duty tur mi 10 an thlangchhuak a, chungte chu :

1. Tv.H.Lalnunpuia - Ch.Sec
2. Pu K.Lalhluna - Ch.Sec
3. Nl.F.Zozampuii - Ch.Sec
4. Nl.MS.Dawngzuali - Ch.Sec
5. Nl.C.Lalnuntluangi - T.Sec
6. Nl.K.Lalhlupuii - T.Sec
7. Tv.K.Huntharlawma - T.Sec
8.Tv.KVL.Hmangaihzuala - V.Sec
9. Nl.C.Lalrempuii - K.Sec
10. Nl.K.Lalnunthari - K.Sec

O/B incharge turin Tv.PC. Zairemthanga, Branch Asst.Secy. chu ruat a ni bawk.

--------------------------------------------------------------------------------------------------

Ngen

Kan hma lawka inthlan lo awm turah inthlanna felfei, thianghlim leh boruak muanawm kan neih theihna tura MPF ten Political Party hrang hrang hruaituten an pawmpuina MPF ten an hmalakna kawng hrang hrang a chhawp chhuah te, a taka hlen anih theih na tura Branch min rawn ngenna chu theih tawpa tawiawm theuh turin member tinte kan in ngen a ni.

--------------------------------------------------------------------------------------------------

MPF

Dt.21.11.2008 zing dar 7:00 khan MPF Kahrawt Local Forum chuan an Office atan Kahrawt Branch YMA Hall-an luah tan a, zing dar 7:00 atanga tlai dar 4:00 thleng duty thin tur a ni a, zan lamah pawh a tul anga duty thin tur a ni. Tlawmngaia duty thin tur a ni.

--------------------------------------------------------------------------------------------------

Central YMA Thu

Dt.4.11.2008(Thawhlehni) a Central YMA Committee Room Aizawla CEC thukhawm chuan kum 2009 atan YMA Kumpuan hranpa kan neilo chungin ‘Ruihhlo Do’ hi theihtawp chhuaha kalpui zel nise a ti a, Ruihhlo Do bawhzui tha lawmman pawh YMA General Conference 2009-a sem turin siam nise a ti bawk.

--------------------------------------------------------------------------------------------------

Security

Dt.16.11.2008 (Sunday) chawhnu inkhawmban khan YMA Hall-ah Security member ten thu pawimawh tak tak an ngaihtuah a, vengchhung a lo thianghlim zel theih nan kawng hrang hranga hma lak zel an tum.An hmalakna tawiawm zel turin vengchhung mipuite an ngen a, YMA Security Cell member te Hall lamah chhuahkhawm leh tawh tur a ni a, member te ngaipawimawh theuh tura ngen kan ni e.

--------------------------------------------------------------------------------------------------

Human Rights

Central YMA leh Zo-Human Rights & Global Networks in ruahmanna an siam zulzui in Dt.20.11.2008 khan Sub-Hqrs.YMA Committee Hall, Tlangrawt ah an nei a, chawhma lamah Child Rights leh Women Rights chungchang zirhona neih a ni a, chawhnu lamah Migrant Rights leh Refugee Rights zirhona neih a ni bawk. Kan Branch atang pawhin mi pahnih tel tura sawm kan nih angin tel a ni.

--------------------------------------------------------------------------------------------------

Humhalh

Champhai Bawrhsap chuan kawngpui kam thingkungte humhalh anih theih nan ram danpui dinglai Forest Act 1980 Clause a.7 leh Mizoram Rule 2001 dan tlawh chhanin kawngkam tawn tawn feet 24 a thing awmte zuaha humhalh turin mitinte hnenah ngenna a siam a, Champhai District chhunga VC tinte hma la turin thuchhuah a siam bakah thupek pawisa lo khua leh mimal an awm anih chuan an chungah zahngaihna tel lova hrem an nih tur thu a tarlang.

--------------------------------------------------------------------------------------------------

Enkawltute Kamchhuak

Inthlan

Kan hma lawka MLA inthlan lo awm mai tur atan Party hrang hrang ten campaign an nei mek a, heng campaign na leh politics kan khelh danah hian kan fimkhur a tha hle.
Mizote hi Politics khel thiamlo hnam kan la ni rih a; innghirngho nan Party politics kan khel ni berin a lang thin a. Ramin hma a sawn ang zela politics khelh ah pawh hian hma kan sawn a hun hle tawh a ni.
Politics hi ram leh mipuite tana thil tha leh tangkai dapchhuahna a ni tur a ni a, inthlan dawn anih avanga phurpui hlut a nawr vak chi a ni lova, party mal inchirhthehna leh indiriamna tur pawh a ni hek lo. Ram leh mipuite tana thil tha dapchhuahna a ni zawk tur a ni.
Party ruihchilh lutukna hian rilru fim min puttir thei thin lova, a pawi hle. In unauna tichhe thei tur zawng leh mipuite inpumkhatna tichhe thei zawng phei chuan politics hi khelh loh a tha hle. Party ruihchilhna hian mi tha hriatna kawngah mit a ti delin, khawhmuh leh ngaihtuahna a tibuai thin. Mimal inbeihna leh tun hnu zet atana tute emaw inkara hriatzui reng tur thil thalo kaichhuak thei zawnga politics khelh te hi bansan a hun takmeuh a ni.
Mipuite pawhin thinlung thianghlim tak leh rilru fim pu chungin kan bial hmasawn nan tu hi nge tha ang tih ngaihtuah chungin vote thlak thin ila, Political party hrang hrangte pawhin thianghlim takin campaign ila, politics hi dik tak leh felfai takin i khel theuh ang u. Party ruihchilhna hian hmasawnna a thlen si lova.

--------------------------------------------------------------------------------------------------

Conference thlirletna

63rd YMA General Conference Serchhipa neih zawh tak thlirletna chu Dt.12.11.2008 khan CYMA Hall, Aizawlah neih a ni a, hetiang hian sawihona neih a ni.
1. CEC in thlenna tur hmun a ruata thlen loh hi a tha lo.
2. Agenda a tlem mah mah.
3. Zaipawl leh malzai a tam lutuk.
4. Artist te Branch in thlan tawh nise.
5. Sound System a tha tawk lo.
6. Gen. Conference thlen dawn hnaia field laih hi tih tawh loh nise.
7. Zai aiin thusawi tam tawh se.
8. Programme duanlawk/tarlan anga kal nise.
9. Kekawrtlawn ha Pandal a luh phalloh anih dawn chuan hma deuha inhriattir tawh nise.
10. Lehlanga item nei turte hi programme ah telh tawh loh nise a tha em?
11. Programme a tello fiamthu tih tawh loh nise.
12. Palaite rualkhai zawka thlenna siam nise.
13. Conference thlengtute inkhawm ngaipawimawh tura inzirtir nise.
14. Traffic ruahmanna a tha tawk lo.

--------------------------------------------------------------------------------------------------

Ngenna

School naupang exam an zo tawhte zanah khawlai len leh bengchheng siam lo turin kan in ngen a, nu leh pa te pawhin kan fate khawlaiah len tir mai mai lova khuahkhirh turin kan in ngen a ni.

--------------------------------------------------------------------------------------------------

1999 khan

Kum 1999 a Kahrawt veng dinhmun lo bih thuak ila :
Mihring - 1887
TV neizat - 110
Phone nei zat - 91
Taxi - 6
Gypsy - 8
Maruti Car - 3
Two Wheeler - 35
Sawrkar hnathawk - 172
Sawrkar Motor - 11
Jeep - 3

--------------------------------------------------------------------------------------------------

CH. R. B

@ Top-up leh recharge duh tan engtiklai pawhin a awm reng e....Tin, Zote kawnga motor khalh ka zirtir kha chu (h), nuam lutuks... - Lalhuna (Civil Canteen)

@ Kum a tawp leh mai dawn... Lalpa kum engzat nge ka la nghah dawn... pasal...pasal... pasalllllll...
- Mafeli (K.Sec)

@ Ka pu Ramte, khawi hmunah pawh min tir rawh....i tana rinawm.. - Bluto Zopuia (Hnam Run)

@ Aizawl atanga ka rawn haw chu Vanapa Hall bul atangin ka luak tan der mai..
- Chhungremi (Ch.Sec)

@ Hello...over... hello.. calling to Vairengte... hello... MPRO atangin... over..
- A-nghaki (MPRO)
@ A !! khai a, kan party manifesto pawh ka hriat miah loh chu.. pawi lo, nula a ni tho a lawm...
- Thanga (T.Sec)
--------------------------------------------------------------------------------------------------

Kristian rama roreltu turin Kristian mipui ten eng ang Kristian mite nge
kan thlanchhuah dawn le?

--------------------------------------------------------------------------------------------------

Website : www.kahrawtians.blogspot.com

Champhai Kahrawt Branch Y.M.A. Chanchinbu * Volume XVII * Issue No 46 * Date.9.11.2008

KAHRAWT BRANCH YMA IN KO KHAWM

Dt.13.11.2008 zan khan Kahrawt BranchYMA chuan vengchhung nu leh pa te, NGO te leh Kohhran hrang hrang hruaitute vengchhunga ruihhlo do zel dan tur a sawi pui a. Beisei ang erawh chuan kal kan thahnem lo hle.Pawl hrang hrang aiawh ten thusawina an neih hnuah sawihona hun hman aniin heta thu sawitute hian vengchhung ruihhlo laka a lo thianghlim zel theih nan Branch YMA te chuan ruihhlo dova hma la chhunzawm zel tura an ngen angin Ruihhlo do hi chhunzawm zel tura rel ani a, kal khawmte hian Branch YMA te hmalakna kawng hrang hrangah full support an pek thu an sawi vek bawk ani. Ruihhlo dona kawnga YMA kut ti chak turin an theihna zawn apiangah YMA kaiza veng turin an in huam thu an sawi bawk. Sawihona atanga rawtna tha tak zingah thla khat danah hma lak zel dan tur leh kal zel dan tur sawi ho turin Branch YMA hian joint meeting hi siama in koh khawmna thin nise tih leh ruihhlo do denchhena mi mante vengchhung a Kohhran hrang hrangah hriattir ve thin ni thei sela, ruihhlo dona kawnga hma latute tan leh an mi mante tan tawngtaipuina leh a tul anga counselling hmanga tan lak ho ni se tih te an ni.
Sawihona neih zawh hian a hnuaia resolution pathumte hi ban phara lungrual taka passed nghal ani:
1. Kahrawt Branch YMA in veng huam chhunga ruih theih thil reng reng zawrh leh lakluh, a in leh ruih khap tlatna dan a neih hi kengkawh zel se tha kan ti.
2. Kahrawt Branch YMA ten ruihhlo vanga an mi mante chunga hremna dan chi hrang hrang an hman mek hi tha kan ti a, a tul anga hma an lak zel hi kan rem ti.
3. Kahrawt veng a lo thianghlim zel theihna tura Kahrawt Branch YMAte hmalakna ruihhlo do leh khawtlang siamthat hi keini veng chhung pawl hrang hrang V/C, Kohhran hrang hrangte leh nu leh pa kalkhawmte hian tha kan tiin kan thlawp tlat ani.

--------------------------------------------------------------------------------------------------

O/B meeting

Nimin zingkar khan YMA Hall-ah Branch OB te chu Joint meeting a rorel bawhzui ngai leh sawi zui ngai awmte sawizuiin committee an nei a, hetah hian Vengchhungin lungrual taka ruihhlo do a rel thluk leh takah chuan a do zel dan tur Branch Executive-in a ngaihtuah leh hma chuan Security cell ten he hna pawimawhtak hi lo kengtlang zel rih se tiin an rel.

--------------------------------------------------------------------------------------------------

Mak ti hlawm

Zirtawp zan Branch YMA in veng chhung nu leh pa, NGO leh Kohhran hrang hrang hruaitute a koh khawmah khan mi 80 vel zen zawn chauh kal khawm ani a. Kahrawt veng in zali chuang awm naah vengchhung thatna tur leh ruihhlo kan do zelna tur ngaihtuahna kawnga zan khat lek pawh hun pe thei lo kan tam ta lutuk hian in enfiah kan ngai hlein thusawitu tamtak ten an ngai hial ani.

--------------------------------------------------------------------------------------------------

Security

Vawiin chawhnu inkhawm ban hian Kahrawt Branch YMA Security Cell member zawng zawngte YMA hallah thu pawimawh tak sawiho tur a awm avangin kim taka kal theuh tur ani a, kohna hi a hranpaa siam anih loh avangin hei hi kohnaah ngai theuh turin kan in hriattir a, rokhawlhna nei chuan Security secretary Pu Thangkunga chhangte hnenah in hriattir tur ani ang.

--------------------------------------------------------------------------------------------------

Chanchinbu man

Kahrawtians agent te khan chanchinbu man kha thahnem ngai takin han khawn leh tauh tauh teh u le. Tin chanchinbu man hi pawisa nawi remchan loh chhuanlama rei tak tak pelo thin kan awm hian harsatna min thlen fo thin a, chuvangin tlawmngai taka a khawntute lo pe hram hram turin kan in ngen ani e.

--------------------------------------------------------------------------------------------------

Khuahkhirh tur

Kan veng chhungah ui leh ar vulh kan thahnem viau a, a khuahkhirh lamah erawh kan inthlahdah leh ta deuh niin a lang. VC thuding lai anih angin mitin ten kan ranvulh kan enkawl that angai hle. Ar chhuah ching ten mi huan thlai an ti chhe fo thina, tin ui vulh te pawhin kan hruai anih loh chuan khawlaiah chhuah tir tam lo ila a tha ang.

--------------------------------------------------------------------------------------------------

Gas thuk thar

YMA General Conference a chanchinbu la tha lawmman kan lak Rs 4000/- atangin Gas thuk lian lei thar ani a, kan thuk thar hi kan Vice President Aizawl zin in a rawn hawn ani a, a mamawhte tan nikhatah cheng 50 in a hawh theih reng ani.

--------------------------------------------------------------------------------------------------

Enkawltute Kamchhuak

Kan veng hi Zoram puma hriat kan hlawh thin dan chu zai ah leh infiamna lamah ani thin. Tunhma lam kha chuan zaipawlah ani emaw infiamna lamah ani emaw Kahrawt veng hi miten an lo U en ve thin kha ani a, tunah hian enge kan dinhmun chiah nita le?
Kawng engkimah hian hlawhtlinna rah tha chhuah tur chuan theihtawp chhuahna leh thu awih theihnate, insumtheihna te neih angai a, heng kan tlakchham tak vang hi nge ni ang heti taka infiamna lamah hian kan tlak hniam tak. Hmanni lawkah Volley ballah kan champion leh hlauh a alawmawm hle. Mahse a la tawk lo. Kha kha bul tanna ang lek chauh ani. Infiamna lama kan veng lo ti hmingtha tawh thin tu rual U te thahnemngaihna-te, thuawih theihnate kha thangthar zawk te hian kan tlachham ta em ni ang?
Tournament a lo awm dawn a, mahni thiam tawk leh tha tawk inti a practice tha peih silo leh practice ground a mahni thu duh, thuawihlo kan awm thin hian game leh combinatin nasa takin a tichhe thin. Practice camp pawh awm thin mahse thuawihna tello chuan hmasawnna a awm thei tak tak chuang lo.
“Kahrawt nge nge” kan lo intih ve thinna te kha chhawmnung zel turin tunah hian thangthar zawkten tihtakzetna leh thuawihna nen ruihhlo lak atanga inthiar fihlim chungin hmasawn tum ranin tan la thar leh ila, mi veng pawin an tih theih chuan keini pawhin kan ti thei ve ani tih hre reng chungin, rilru thianghlimlo pu chuang silovin infiamna lamah Kahrawt veng ti hmingtha leh turin tan i la thar leh sauh sauh teh ang u.

--------------------------------------------------------------------------------------------------

MPF Champhai District Rorel-te

Dt.10.11.2008 (monday) khan MPF Champhai District chuan MLA inthlanna thianghlim leh fel fai zawk kan neih theihna tura ruahmanna siamin joint committee an nei a chuta an rorel te chu:
1. Party office ah party flag pahnih aia tam lo tar nise. Mimal inah phei chuan tumahin party flag tar loh nise, lo tar tawh an awm anih pawhin lak thlak leh vek nise.
2. Party manifesto leh lehkha sem tur pawimawh reng reng MPF local forum te kaihhruaina siam anga sem tur ani. Party hrang hrang ten local forum hruaitute zai ngai taka kal nise.
3. Banner leh poster tar tur zat chungchangah constituency forum O/B ten ruahmanna an lo siam chu kalpui tur ani a. Khawpui chhungah 50 aia tam lo leh khawpui pawnah 40 aia tam lo tar nise tih ani.
4. Vote thlak tur motora phurh hi election model code of conductin a khap avangin tih loh tawp tur ani a. Local forum thenkhatin ruahmanna an lo siam tawh pawh sut leh se kan ti.
5. MPF headquarters hruaitute leh Political party hruaitute thutlukna lo siam tawh bawhzuiin election niah vantlang tan thingpui lum loh tur ani.
6. Polling station area-ah MPF duty te chauhin electoral roll an thutpui ang ti a local forum ten ruahmanna an lo siam chu tha kan tiin hetiang hian kal nise kan ti a, tu party mahin polling station bulah electoral roll thutpui loh nise.
7. MPF local forum ten a remchan anga information centre an siam hi tha kan tiin kan pawmpui.
8. MPF leh political party tin aiawhte duhdan lo zam tawh bawhchhia a, therhlo sem man chian te chu a mantu local forum ten biakinah leh YMA information mike atangin a puang thin anga, a tul dan azirin hemi piah lamah thleng pawh hma lak zui zel ani ang.
9. Motora party flag tar chungchangah uchuak lutuka tar lo turin party tin te ngen an ni.

--------------------------------------------------------------------------------------------------

Exam zo

MSLC/MESLC te chuan exam an zo fel ta a, chutih rualin HSLC exam beiturte ngawrh takin an in puahchah leh mek thung. Vengchhung atanga MSLC/MESLC exam beitu zawng zawngte Kahrawtians chuan hlawhtling theuh turin duhsakna a hlan mawlh mawlh ani.

--------------------------------------------------------------------------------------------------

CH. R. B. Huang

z Kan pa pheikhawk lei ve zet chu(h) a in khing lo in a lei pek a, hrechhuak miah lovin a thla tel tehmeuh zuk bun thei a mawle. - Pi Tumi (T.Sec)

z Tun tum kan President han damlo chu buh-hawp a ei puk puk mai a, a hmel en chuan buhhum chaw a ring thei hmel a put tehreng nen ka lainat roh ngawt mai. - Chhuana Fin.Secy

z Patling candidate buaipui ai chuan Nula candidate han campaign pui vel chu anuam ka ti zawk fe. - Thanga (T.Sec Leader)

--------------------------------------------------------------------------------------------------

Roreltu dik thlang chhuak tur chuan a thlangtu mipui ten rilru dik kan neih hmasak angai.

Champhai Kahrawt Branch Y.M.A. Chanchinbu * Volume XVII * Issue No 45 * Date.9.11.2008

Kahrawt Branch YMA Executive Committee vawi 8-na neih a ni

Dt.6.11.2008 (Ningani) zan dar 6:30 khan Kahrawt Branch YMA Executive Committee neih a ni a, an thurel tlangpui :
1. 63rd YMA General Conference Serchhipa neih ah kan Branch atanga palaite kalna atan Sumo pahnih hmanna Rs 14000/- chu lungrual taka pawm a ni.
2. Kahrawt Branch YMA Security Cell Secretary hnen atangin kumpuan ‘Ruihhlo Do’ kan neih hma leh neih hnua kan vengchhung dinhmun te ngaihthlak a ni a, Security Cell te hmalakna avanga kan vengin hma a sawnna te ngaihthlak a ni bawk.
3. Central YMA in Ruihhlo do a hlih tak avangin kan vengchhung bik a kan kal zel dan tur sawiho ani a, Ruihhlo hi do chhunzawm zel nise tih a ni. Ruihhlo do zel dan turah hian vengchhung nu leh pa te leh NGO hruaitute leh Kohhran hrang hrang hruaitute ko khawm a la sawiho leh ni se tih a ni.
4. Pu Biakhranga, kum 1959 a Kahrawt Branch YMA Asst.Secretary hna lo chelh tawh chu Aizawl Chaltlang ah a boral a, Executive in thu a lo dah tawh angin Hruaitu hlui ngaihhruihna hlan nise tih a ni bawk.

--------------------------------------------------------------------------------------------------

Kahrawt Field hman dan tur

Branch Executive vawi-7na chuan uluk takin Kahrawt field hmandan turah hetiang hian ruahmanna a siam.
a) Kahrawt field hi Kahrawt Branch YMA ta anih angin a neitu nihna hi a chang chho zel anga, a chhunga sport discipline hrang hrang atana hmasawnna tura ruahmanna awmte pawh Kahrawt Branch YMA remtihna a kalpui thin a ni ang.
b) Infiamna (Sport discipline) chi hrang hrang eg. Basketball, Volleyball leh a dangte atana sawrkarin court leh thildang te a rawn sia m enkawl zuia venhmin chngchangah Kahrawt Branch YMA leh District Sport Committee in a tul angin hma an la ang.
c) Sport discipline hrang hrang ten tournament an buatsaih dawnin Kahrawt Branch YMA ah dilna sia thin tur a ni. A tul angin Branch YMA in District Sport Committee te a hriattir thin ang.
d) Sport discipline awmsa nilo, concert, crusade leh ticket hmanga sum hmuhna tura hmang duh an awm anih chuan a hman dan tur leh a hman manah Kahrawt Branch YMA leh a hmangtute inbiakremna a ni anga, a hmangtuten a tihfai ah mawhphurin tihchhiat an neih phei chuan a siamthat leh naah mawh an phur nghal anga, a senso ngaite pawh anmahni tum tur a ni ang.
f) Kahrawt field hi Kahrawt Branch YMA Property a nihna angin vengchhunga Pawl hrang hrang, Kohhran leh mimalin an hmang duh anih chuan Kahrawt Branch YMA ah dilna an siam thin anga, a tihchhiat siam that leh a tihfaiah a hmangtuten mawh an phur ang.

--------------------------------------------------------------------------------------------------

Chawngbawla Section

Nimin khan Chawngbawla section te chuan Branch YMA tan Fianpui pahnih lian tha tak mai an pe a, an chungah Branch YMA chan lawmthu a sawi takzet a ni.

--------------------------------------------------------------------------------------------------

Ngenna

Dt.13.11.08 (Thursday) zan dar 6:30 hian Kahrawt Branch YMA Hall-ah vengchhung nu leh pate, NGO hrang hrang te leh Kohhran hrang hrang hruaitute veng chhunga ruihhlo kan do zel na kawnga kan kal zel dan tur ngaihtuahho tur anih avangin kal theuh turin kan in ngen a, chhungkaw tin atangin mipakhat chhungkaw aiawh zo ngei kal theuh turin kan in hriattir a ni. Executive memberte phei chu chhungkaw aiawh kan intir tho anih pawhin kim taka kal theuh turin kan in hriattir a, ahranpa a kohna dang siam anih dawn loh avangin hei hi ngaipawimawh theuh turin kan in ngen nghal bawk ani.

-------------------------------------------------------------------------------------------------

Champion

Champhai District Volleyball Assn. in an Silver jubilee denchhena District huap Volleyball competition an buatsaihah Kahrawt Sporting Club te chu an champion a, Branch YMA chuan KSC hruaitute leh members te thawhrimnaah fakawm atiin an champion hi a chhuang takzet ani.

-------------------------------------------------------------------------------------------------

Pathumna

Champhai District Tug of War competition Kahrawt field-a neih zawh takah pawh kan veng chuan lawmman pathumna kan la bawk a, veng tana thahnem ngai taka inhruipawhte chungah pawh Branch chuan lawmthu a sawi bawk ani.

-------------------------------------------------------------------------------------------------

Enkawltute Kamchhuak

YMA in ruihhlo do kum a puan hma leh a puan hnu inkar, Zoram pum chu sawi loh kan veng chhung dinhmun khawtlang nun leh chhungkaw nun lo danglam tawhzia hi kan ngaihtuah ngailo maithei. I ngaihtuahna kha han sawmkhawm teh le.
Kan khawtlangah hian ruihhlo do puan anih hma kha chuan kan tlangval rual leh pa valai rualte kha zu ruiin khawlaiah an leng huai huai a, zan reh pawh a awmloh chuang a tam hle thin anih kha. Tunah hian han ngaihtuah chiang teh le. A hlawkthlak i ti em? Ruihhlo do puan anih hma khan zunin, kawr kam leh puk remchang laiah te khan enge i hmuh thin? Pawna thawmhnaw zar, ran chi hrang hrang ven a ngai reng mai a, mutmu pawh tuah lova kan awm thin na te kha i la hre reng em?
Kan inchhung khura buaina kan tawh thin tam tak kha nupui fanaute raltitna, bungbel, in a sum leh pai kan senralna hrang hrangte kha han ngaihtuah let ve teh. Kan fanu fapa te an thianghlimna tichhetu tamberte hi kan chawhmeh ei al lutuk leh chaw bar len vang te hi ani em? Nilo. Zu leh ruihhlo avanga thi mai tur te kha vawiinah hian engzat nge la dam han chhut ve chhin teh le. Hman atang khan lo ti ta sela chuan kan then tak thalai tamtakte nun kha a lo chhanhim dawn a lo ni reng mai. YMA te hian he kumpuan avang hian cheksawlh leh tihelna te tawng tam hle mahse, a hlawkna tel tute chu keimahni kan ni leh tho. Hmana boral tawh tur khan vawiinni thleng hian hlim takin khawvel a la hman theih hi! Chuvangin kan khawtlangah hian heng thil tha lote hi i ti tlangnel lo hram teh ang.

-------------------------------------------------------------------------------------------------

CYMA President Kamchhuak

“.. kan insuihkhawmna awm chhun YMA hi ram mipuiten mi beiseina a sang hle a, kan nun leh chezia hi ngun takin an thlir a, YMA hi thianghlim taka kal zel turin min duh a ni. Sawrkara roreltu kan thlanin thianghlim leh felfai kan duh a, chuvangin YMA inthlanna hrang hrang-CYMA, Sub-Hqrs. Group leh Branch ah pawh kan inthlanna hi a thianghlimin a felfai tur a ni. YMA tibawlhhlawhtu leh ti hmingchhetu ni lovin a timawitu nih theuh i tum ang u.
Inthlanna thianghlim leh felfai tak kan neih theihna tur hian YMA leh MPF ten nasa takin hma an la mek zel a.Kan hriat theuh angin Mizoram hi International border thui tak Myanmar leh Bangladesh nena nei ani a, Tin, State border Assam, Manipur leh Tripura nen kan in tawm bawk. Kan thenawm ramte hi hel pawl awmna vek an ni a, development a awm theilova, inthahna, chibing leh hman bing inbeihna hmun ani. Mizoram pawh hi hel pawl hrang hrangin ram pawn atanga tihbuai theih ani. Hel pawl inrawlh hian voters ten zalen taka mahni duhthu ngei a vote an thlak theihna a tibova, vauna avangin leh intihthaihna avangin mahni duhthuin vote an thlak thei lo thin.
YMA pawhin party hrang hrang PAC memberte kawm kualin hel pawl leh ralthuam kengte hi thawhpui lo tur leh sum leh paia inthamna cheleklo turin a ngen veka, Party tin te pawhin hel pawl thawhpui loh leh sum leh pai chelek loh an tum thu an sawi theuh ani.
Party hruaitute mai bakah hel pawl hrang hrangte pawh CYMA hruaituten an kawm vek a Mizoram MLA inthlanna-ah inrawlh loh an tum thu an sawi vek ani....”

-------------------------------------------------------------------------------------------------

Sporting Club

Kahrawt Sporting Club member Volleyball competition a chhuak ten kan Jersey hak kha thawhtan-ni ralhma ngeiin Pu Zairemchhunga hnenah thehluh vek tur ani.

-------------------------------------------------------------------------------------------------

Chiangkuang lo

Tunlai kan infomation line thenkhat a chiangkuan loh avangin tlangau hrechiang thei lo kan awm thin a, a pawi kan ti hle. Siamthat mek zel ani a, mipuite phun nawi mai lova kan harsatnate min lo hriatthiam sak hram hram turin kan in ngen ani.

-------------------------------------------------------------------------------------------------

Lawmthu

Tv. Isaac Lalramlawma Ralte S/o R.Laldika Vanapa section chuan ama mimal thahnemngaihna liau liau in Kahrawtians chu Internetah, ram dang a kan member awmten an tlawh a an chhiar theih turin min thun sak a, a chungah Kahrawtians Editorial te an lawm hle. He website tlawh duhte tan www.kahrawtians.blogspot.com ah a tlawh theih reng ani.
Tin, kan infomation a kan hman lai amplifier chhia min repair sak tu Pu Sawmtea (UPC) chungah lawmthu kan sawi bawk.

-------------------------------------------------------------------------------------------------

CH.R.B

Tluangte, Sailoa’n ka tooth brush a lo hmang a, vawi hnih vawi thum chu ka hmang zui leh mai a, tunah chuan ka hmang phal tawh lo ka dahtha hmaks.
- Zari (V.Sec)

-------------------------------------------------------------------------------------------------

A Kohhran aia hlu zawk khawvelah engmah Pathian tan a awm lo. famkim lohna te nei mahse, Kohhran chu phur takin kan hmangaih tur a ni.